La Notizia///////////////////
/////////////////di Tonino Bussu

O=========================O

////////////////////////////

Sa die a Tonara in s’iscola

////////////////////////////

Sos pitzinnos de sa prima elementare an presentau su contu de compare Sorighe e de compare Puddu, e an fattu puru unu power point pro custu contu, semper in limba sarda.
An sighiu sos de sa V^ classe, de sa 2^, 3^ e 4^ presentande s’istoria de sa Sardigna in limba italiana in rima, sa cantone de Frantziscu Innassi Mannu ‘Su patriottu sardu a sos feudatarios’ recitandende cada pitzinnu un’ottava e traduindela puru in italianu.
Sa secunda e sa terza media an presentau s’istoria de sa Sardigna in limba sarda firmandesu su prus in su tema de sa die de sa Sardigna , su 28 de aprile de su 1794, supra sa frigura de Giomaria Angioy e de sas lottas contr’a su feudalesimu.
Ma an trattau puru poetas sardos comente a Bostianu Satta faveddande e mustrande magines de sa pratha chi in Nugoro pro custu poeta at fattu s’artista sardu de Orane Titinu Nivola.
At presentau sa serada su mastru Gianni Dessì ispiegande s’impignu chi b’est istau pro arribare a imparare custas cosas, mentres sos relatores Tonino Bussu, Paula Mereu e Teresina Serra an faveddau de s’importu chi tenet a imparare a sa limba sarda e a trattare sos argumentos de istudiu in sa limba nostra.
E an incorazau mastros, professores alunnos e genitores a pessare chi in iscola s’imparet s’istoria nostra e s’istudien sas materias in limba sarda.
An puru marcau s’importu chi tenet a impreare su sardu cada die comente limba veicolare in iscola inditande puru chi sos docentes imparen a sos istudentes s’istoria de sa Sardigna a livellu de materia de ponner in su curriculu iscolasticu, in su pianu de s’offerta formativa.
Est istau unu bella, toccante e coinvolgente manifestazione sa chi s’est fatta in Tonara su vortaedie de su 29 de Sant’Andria in s’Auditorium Comunale de Tonara inube si sun sortios totus sos istudentes, sos docentes, sos genitores e medas ateros tonaresos chi an ascurtau pitzinnos e relatores faveddande in sardu a dimostrazione chi si si cheret su sardu si podet ancora imparare e sos pitzinnos, si tenen docentes appassionaos de sa limba e de s’istoria nostra suni dispostos a imparare su tonaresu, sa limba sarda.
Non pariat beru chi custos pitzinnos in su ziru de pacu tempus, grassias a s’impignu de sos insegnantes, esseren rennessios a imparare in limba tantas cosas, a imparare s’istoria issoro, a recitares sos contos in limba, a pintare in sos disignos s’istoria de s’isula nostra.
Eppuru l’an fattu! Bastat a tenner s’idea e sa volontade!
Alunnos, professores, mastros e genitores si suni impignaos a nde fagher medas ateras de custas dies chi si sun potias puru festare grassias a su contributu de s’Assessorau Regionale a sa Pubblica istruzione.
(04-12-2011)