|
“E sì, carissimu
Giuanne! - narait seriu Antoni - Cuss’accidente de preigadores
chi sun in giru, cun sas chiaccheras issoro si sighin goi ti faghen
a creer finas chi s’ainu olada, ogni olta chi los intendo, mi
che faghen sa conca che moggiu”.
E Giuanne, rattandesi in conca: “E cando mai?”.
“Ti lu so’ nande, Giuà, cussos portan dimonios!
Deris sun bintrados a domo e han isterridu in sa mesa unu muntone
‘e libereddos de religione.
De cale esseret no l’isco ca pagu mind’intendo, ma a dogni
modu han cuminzadu cun sas solitas chiaccheras, de comente mi devia
cumportare e po mes’ora fun semper nande sas solitas cosas:
“Non t’imbriaghes, no frastimes, no andes cun feminas
anzenas”!
Deo tentai de lis ispiegare chi cant’a cussu non b’hiat
perigulu, ca sas feminas solu a mi bier si fuian, ma cussos mancu
m’iscultain e sighian a insistere.
Su prus fuit subra ‘e su fattu ‘e fagher ‘bene’
e de pensare chi una die, su bene chi faghia a sos atteros beniat
ricumpensadu.
E assora deo, tentande de poderare su risu lis domando:” E comente?”.
Issos m’abbaidan serios, e su preigadore prus anzianu mi rispondet
alziande sas manos a su chelu:
“Deus s’onnipotente mos hat mandadu po bos narrer chi
sa fine’e su mundu est po arrivare, ma un atteru mundu est isettande
de mos accoller a pustis mortos”.
Poi sighit: “Cando morimos s’anima non morit ma olat in
s’aera finas a cantu leat possessu de un atteru essere vivente,
omine o animale, però non podet seberare, ca cussu dipendet
tottu da su bene chi hat fattu durante vida”.
Poi m’han domandadu un’offerta, po sos poberos de no isco
inue, e poninde su inari in bussaca si che sun andados.
“Beh, Giuà, si cheres a ti narrer, deo paga cosa l’his
appo cumpresu, ma so ancora tottu istontonadu.
Tue Ite nde pensas”?
“Ahi, Antò, ma cantu ses maccu si crèes a tottu
sas fesserias chi ti naran! Cando semus mortos semus mortos, e no
b’hat Deus e ne santos chi mos torren a bida”.
“Bies? Deo so tranquigliu e a custas cosas non bi creo. A mie
mi bastat de mandigare e buffare dogni die, e tottu sas chiaccheras
e chie las narat chi anden in chentu diaulos!”.
“Tenes resone, Giuà, ma si non creimos in nudda mos naran
chi semus ateos, miscredentes e, a parte ‘e cussu, mos trattan
de tontos!”.
“Caru Antoni, tue mi pares pizzinneddu; tottu su chi ti naran
ch’ingulles! Como narami una cosa; si esseret beru cussu fattu,
faghemi a cumprender ite gustu b’hada a morrere e torrare a
nascher a pustis de tantos patimentos in sa primma vida?”.
Anto’; pensala comente cheres, ma deo isto bene goi, subra sas
mattas de su frenugu, sena fagher nudda e ne pensare a s’incràsa:
cando proet, tenzo cantas feminas chelzo, e poi drommo drommo meses
intreos.
Po cussu, frigadinde e lea sa vida coment’este, e si est possibile
de custos contos no mi nde torres a mentuare!
E po’ piaghere chirramiche cuss’accidente ‘e cambas
a serraccu, ca si sighis a frigare che ruo e mi trunco sos corros!”.
Antoni, offesu, s’ispostat abbell’abbellu, pinnigat sos
serraccos e serrat sas battor’ alas.
Poi che ruspiad’unu ranu ‘e trigu, e frigande a pare sas
antennas li narat:
“Tue la pensas gai ca non crees in nudda, eppuru a bidea mia
in calchi cosa bi depimos creere!”.
Giuanne girat sos corros a car’a bassu e l’abbaidat infadadu,
poi primmu de che rientrare sa conca a intro ‘e domo ch’ettad’unu
ruttu e li rispondet: “Antò, tue ses peus de issos chi
t’han post’in conca custos macchines, ma deo ti lu ripito:
in custas cosas non bi creo!”.
(rioro)
Premiadu in Selargius su
2004
|
