La
Notizia///////////////////
/////////////////di Tonino Bussu
O=============================O
////////////////////////////
Sa Die de sa Sardigna in s’iscola de Tonara
////////////////////////////
S’istituto Comprensivu de Tonara festat sa Die de sa Sardigna, su
28 de parile, festa de su populu sardu, presentande su traballu chi pro
custa manifestazione est istadu fattu in iscola cun sos pitzinnos , in
sos attobios cun sos docentes e sos espertos prof. Tonino Bussu e prof.ssa
Paola Mereu.
Sos pitzinnos de s’iscola elementare pro ammentare sa die an cherfiu
perparare, istudiare e imparare a memoria sa Ninna nanna de Antoni Istene,
iscritta dae su poeta de Desulo Montanaru, Antiogu Casula chi augurat
a su fizu serenidade, sicuresa, erbeghes medas e pasturas fioridas e una
vida duncas dignitosa e bragosa puru accumpazada dae sa fortuna.
Sa poesia est sa pintura de s’economia e de sa vida de unu tempus
in Sardigna.
Ateros pitzinnos de sas elementares an a presentare una recita cun versos
de Peppinu Mereu, su poete tonaresu prus famadu, e de s’innu de
Frantziscu Innassi Mannu ‘Procurade ‘e moderare barones sa
tirannia’, inuve si rappresentat sa situassione de sos sardos a
sa fine de su settichentos, s’oppressione feudale, sa ribellione
de su 28 de aprile, sas condissiones de grandu aprettu e miseria in sas
cales sa zente biviat.
Pitzinnos de s’iscola media inbetzes recitan su prus sos versos
de Frantziscu Innassi Mannu incuadrandelos in sa sarda rivoluzione de
su ‘700 cando bi suni istadas sas lottas contr’a sos barones,
sos feudatarios.
Ateros pitinnos de s’iscola media an trattadu su tema de sas artes,
de s’iscultura e de su ligame chi b’est cun sa letteratura
e sos poetes.
Difatis an istudiadu s’arte de Titinu Nivola e sas isculturas chi
at fattu pro sa Pratza pro su poete Bostianu Satta de Nugoro chi at cantadu
sa realidade de sa Sardigna de s’ottichentos e de su novichentos.
Custos traballos, poesias, recitas s’an a fagher in Tonara su 28
de aprile a sas chimbe de bortaedie in su teatru civicu pro mustrare a
sa popolassione s’impignu e s’idea de sos pitzinnos pro connoschere
e fagher connoschere sa letteratura e s’istoria de sa Sardigna.
Est de importu s’azudu chi sa regione, assessoradu a sa pubblica
istruzione, at dadu pro istudiare custu periodu de istoria sarda, de sa
sarda rivolutzione.
(26-04-2012)
