A
Tiu Peppe a Luisi e Maria
di Minnia Pani
E sonan che campanas atarzinas
cun d’una rosa bella mai cantu
sas rimas galu chi sun un’incantu
sas manos de Luisi sun divinas
Sos versos cun sa rosa delicada
at mudadu a festa cussa mesa
est impremida de vera bellesa
ma de vellutu paret, ses tocada.
Bos auguramus lùghida che luna
fiorat a Luisi sa richesa
e Maria vivat de cuntentesa
chi l’ abbelzat sa janna sa fortuna
In sa vida potedas gosare
totu e tres lugorosa salude
dignos de gratzia de ogni virtude
sos fizos de Luisi tot’umpare
Siat indeorada cuss’ispera
ma pro la poder finas carignare
che tramas de siendas de tocare
che pasidos isteddos in s’aera
Banzighende sas rimas est ninnadu
notze d’oro de fagher in sos annos
fioridos de sos beranos mannos
a ogni versu lughe l’azis dadu.
E sos saludos nois bos mandamus
ringratziamus pro su cumprimentu
Intro ‘e coro tenimus ammentu
de s’amistade pro cantu duramus.
Custos versos cumpostos cun ardore
saludos caros Minnia e Tore.
Otieri, 13-05-2011
|