Atunzu
di Mario Nurchis

Addaju addaju su sole
s’est fattu ‘inchere
da nues andantanas
murinas e nieddas
chi si sun attutturradas
e imbaran in chelu totta die
furendenos su calore istadiale.
Sos bentos frittos frusciende
giaman sa pioa noale
chi mitzelios ‘e cugumeddos
aisettaìan dae tempus
e a s’avreschida tebia
iscioppan buttones biancos nidos.
Fozas grogas e arantzinas,
che bandeleddas a su ‘entu,
bortulan e furrian
donosas e pazosas
fintzas a si corcare lenas in terra
a la iscaldire de assaccarros tintos
pro l’ammessedare
de sa frua beranile.

Ma s’istìu morzende at lassadu eredu mannu
e, mancari sas dies sun pius minores,
a dresta e a manca b’at su nuscu
de sa castanza arrustu
e-i su fiagu ‘e mustu ‘e sas cantinas
abberit sas toveddas.
Calcunu at ammaniadu cariga cun mendula
a sos Santos
e-i su ‘inu nou assaboradu,
at addulchire s’ammentu rantzigu
de chie non b’est pius.

Secondo Premio versi liberi al Concorso di poesia Peppinu Mereu 2010