Batorinas cun Ninni da Mascate
di Francesco Sanna

A Tzitzu Sanna in su Sultanatu de Oman
arrennegadu ca no’ apo rispostu

* * *

Istimadu fradile Tzitzu Sanna
tenzo su computer indispostu,
si prontamente no' t'apo rispostu
no' mi nde fetas una neghe manna.

Cun sos mezzos modernos peleande
e cun virus de dogni calidade
chi no' tenen peruna piedade
sas ferias mias si che sun andande.

De cantu chi mi sunu pressighinde
finas Todolos apo immentrigadu
e in domo mi nde so' abbarradu
po los tentare a da chi sun bessinde.

Duncas, si mi perdonas su ritardu
e mi torras a iscrier a coro abeltu
de su chi faghes in ue che ses feltu
t'apo a risponder in limbazu sardu.

Narami si as retzidu, a sos congruos,
custas quartinas male cumbinadas
chi ti che mando como e sun datadas
otto 'e Austu 'e su Duamizaeduos.

Isperande calmadu 'e t'aer sas iras
ti saludat Antoni - Ninni Piras.

* * * * * * * * *

Risposta de Tzitzu

____Virus ? No, Gratzias !____

Caru fradile sas dechidas rimas
chi m'as imbiadu za sun arrivadas
comente a s'usu bene accumpagnadas
da magialzas intragnas anonìmas.

Cumprendo chi s'istentu no est debadas
e chi sas novas no sun tantu bellas
ca a su ch'intendo tenes sas rotellas
de su computer iscassialotadas……

Ma cussos virus tue no los debellas
mancari ti los tentes chena posa;
naralu a su nebode 'e Renzo Rosa
de t'innetiare discos e cartellas.

S'aidiesse elettronica virosa
tepet esser sa bomba de cust'era,
sa die ch'iscopiat de mala manera
ponet a cul'in terra dogni cosa.

E a ti la narrer sintzera sintzera
no creo chi cussa die siat gai lontana,
ca sos malos signales chi mos dana
minettan temporales dae s'aera.

Deo so polcrabu e mi bastat sa tana:
si finit sa castanza pappo lande,
e no m'assusto si nde sun calande
sas turres de Babele americanas…

Issos in domo anzena sun chilcande
sos mandantes de su ch'est capitadu;
no si seran chi como an incunzadu
cudd'elba mala chi fuin semenande.

Grassias a Deus in custu ighinadu
sa zente est rispettosa e tollerante
li dana s'aba sua a s'arrogante
no bi pelean e no si lean infadu.

Cumprenden chi si unu est ignorante
da oe a cras no si podet cambiare…
tenen passensia e lu lassan barrare
o si dispedin cun modu elegante.

Innoghe tenzo meda ite imparare
- ca so latranghi cultzu cadatantu -
issos invece si nde faghen bantu
chi sun de raza 'e Giobbe in s'agguantare.

E infatis in sa tumba 'e cussu santu
b'at semper zente da sero a manzanu,
lu mentuat tantas boltas su Coranu
e sos credentes lu veneran tantu.

De bona cotta est fintzas su sultanu
paret chi de nisciunu siat nimigu,
su nou mescurat bene cun s'antigu
est orgogliosu e fieru, ma est galanu.

Tenet su logu pulidu che isprigu
cun tantos frores simile a una serra
chi fintzas sos gialdinos de Inghilterra
in cunfrontu paren fattos de oltigu…

Sun neutrales e sun contr'a sa gherra,
servitziu militare no che nd'ada…..
atzetan bene sa zente immigrada
chi assoltin da ogni logu e da ogni terra.

A s'aria puru l'an 'conditzionada',
in macchinas e domo, a sa friscura,
ca innoghe a di ch'arrivat sa calura
fintzas sa tilighelta est immandrada.

A palte su calore… sa cultura
de tottu sas ch'ap'idu est mezus custa,
e si m'arrivat s'occasione giusta
in calchi tanca ponzo sa cresura.

Ca deo soe attrividu e no m'assustat
de pascher a betzesa un'uchisolza…
e si no b'at erbaiu in sa cussolza
za m'accuntento fintzas de sa 'edusta.

Como tocat de istringher sa chintolza
de custas rimas, ca meda est s'istentu,
no at andare issu puru a cundimentu
chi nd'enit cun sos virus chiu e colza?

Po cussu no ti fides, ista atentu
no ti nde cundan fintzas sa muzere..!
Ca si istentat faghinde su dovere
ti sighit aumentare su trumentu...

Isperande 'e bos aer fattu piaghere
saludo a tottu cantos cun istima
e bos pido peldonu si sa rima
a boltas ch'est bessia comente cheret…

Tue rispondemi in presse, cantu prima,
narami de parentes e de Iscanu
ca mancari su corpus siat lontanu
sa mente cadatantu si b'arrimat.

Pregande 'e ti connoscher semper sanu
ti abratzat su fradile musulmanu.

* * * * * * * * *

Mascate, Austu 'e su 2002