Maria:
Cun tristu mantu abbasciadu
preguntat Maria a reu:
nade si s'amadu meu
in custa via est passadu.

Veronica:
Dama 'e suprem'istadu,
non ch'hat passadu nissunu,
solu che nd'hat passad'unu
a morte sentenziadu.

Maria:
Nade, Veronica amada,
gasi tenzedas sa gloria,
s'est chi tenides memoria
de Maria s'attristada,
de sa prenda mia amada
tenides calchi recadu?
Nade.

Veronica:
Garrigadu de cadenas
unu nd'hat passad'inoghe
senza alientu ne boghe
pro sos turmentos et penas,
sas laras de samben pienas
pro sos colpos chi l'hant dadu.
Solu.

Maria:
Veronica mia cara,
cussu no est fizu meu
chi dat a totu recreu
cun sas lughes de sa cara,
sa bellesa tantu rara,
su corpus tant'assentadu.
Nade.

Veronica:
In mes'e tantos soldados
lu portaiant tira tira,
totu lu ferint cun ira
a colpos desappiedados,
sos pilos totu tirados,
su corpus insangrentadu.
Solu.

Maria:
Rajos sunt d'oro lughentes
sos pilos de fizu meu
ue hat ingastadu Deu
milli soles risplendentes,
che fizu meu in sas zentes
pius ermosu no est nadu.
Nade.

Veronica:
Gesùs, o Segnora mia,
ch'ando sighende su rastru:
algunu grave disastru
suzzedesit a Maria,
però est mama 'e agonia
mama chi l'hat ingendradu.
Solu.

Maria:
Eo so cuss'affliggida,
eo so cuss'attristada,
eo so cussa tribulada,
eo so cussa persighida;
oh prenda mia nodida,
chie t'hat male trattadu!
Nade.

Veronica:
Mirade, Segnora mia,
su rastru bos det ghiare:
in dogni logu che pare
lassat su samben a bria,
lu portant cun tirannia
coment’e cane ligadu.
Solu.

Maria:
Est fizu meu divinu
de cara sa pius ermosa;
dogni massidda una rosa
dogni trempa unu gesminu,
personaggiu peregrinu
garbu su pius aggiustadu.
Nade.

Veronica:
Sas trempas abboffettadas,
sas massiddas male fertas,
sas palas giughet abbertas,
sas laras insangrentadas,
sas manos ben'attrozzadas,
s'alientu li faltada.
Solu.

Maria:
Tremendos sunt sos signales
de fizu meu amorosu
ch'est su sole luminosu
de sas cortes zelestiales,
cun cussas novas mortales
hapo sa vida accabbadu.
Nade.

Veronica:
Rodeadu 'e buzzinos
et de tanta zente mala,
cun duas bigas a pala
lu portant sos arguzinos,
totu tintos sos caminos
in samben nos hat lassadu.
Solu.

Maria:
Adios, Veronica mia,
ch'ando sighende su rastru,
algunu grave disastru
si li sighit a Maria;
vida de sa vida mia,
chie sa morte t'hat dadu!
Nade.

Veronica:
Bazi, intrade in custa porta
pues sos signales, Maria,
non sunt de persone bia
ma de persone morta,
inogh'est rutu una orta
cun su pruer mesturadu.
Solu.