Est una die luminosa
di Gianfranco Rosa

Est una luminosa die crara;
Po chie passat vida tempestosa
A l'aer bid'asie est cosa rara.

Po su mundu, sorte, ses avara
E sa morte bundante ispravìnas,
Tott'in tundu, incurant’e sas ruinas;
Po su mundu ses avara, sorte,
E bundante ispravìnas sa morte
Incurant'e sas ruinas, tott'in tundu;
Ses avara, sorte, po su mundu
E sa morte ispravìnas bundante
Tott'in tundu, 'e ruinas incurante;
M'a boltas ses prodiga e festosa.

Po chie passat vida tempestosa,
Est cosa rar'asie a l'aer bida;
Est una die crara, luminosa.

In su manzanu, sa vista maestosa
Mirat lontanu sos montes de oro;
A dogni crista suspirat su coro!
Sa vista maestosa, in su manzanu,
Mirat sos montes de oro lontanu
Su coro suspirat a ogni crista !
In su manzanu, maestosa sa vista,
Sos montes de oro lontanu mirat;
A dogni crista su coro suspirat
Ca de sole sa terra s'est bestida.

Est cosa rar’asie a l'aer bida;
Est una luminosa, crara die
Po chie passat tempestosa vida.

Sardigna ospitale e cumprida,
Chi tribulias de temporal'as tentu,
Sias s'insigna de custu mamentu;
Sardigna cumprida e ospitale,
Ch'as tentu tribulias de temporale
De custu mamentu sias s'insigna,
Ospital'e cumprida Sardigna
Chi temporal'as tent’e tribulias
De custu mamentu insigna sias
Ca su sol'est naschinde pro a tie.

Est una luminosa, crara die;
Po tempestosa vida passat chie
Est cosa rara l'aer bid'asie!

Iscanu 2000