Milla sa luna chi dae su monte
Apen’apena s’idet ispuntande
Bestind’e biancura s’orizonte.

Abbell’e abellu a inartu est pigande,
oe ch’essida est rutunda e piena
paret sa note in die cambiande.

Silenziosa, candida e serena
naschede, creschet, morit e dae nou
torrat a nascher prus bella e amena.

In s’infinidu chelu olat a prou
e solu Deu chi l’at dadu vida
ischit de su misteru viver sou.

Est de sa note reina e guida,
de sos pastores che santa invocada
ca li est de amparu e de guida.

Dominat da inartu incuntrastada
e de cantu suzedit in sa terra
non fuet nudda a sa sua mirada.

Osservat s’afannosa cuntierra
de Astronomos e Iscienziados
chi contr’a issa sun sempere in gherra.

Tantos e tantos razos imbiados
los ana, fin’a cando bi l’an fata
e subra sua che sun aterrados.

Ma si sa luna est in color’è prata
deviat essere barria’e arghentu,
sende chi solu’e pedra apidu an trata.

E pro me cuss’arcanu avenimentu
at adurare sempre unu misteru
e sigo a la mirare cun cuntentu

e l’aer istima e cunsideru
che-i sa prima orta chi l’ap’ida.
In medas naran chi non siat beru

Chi siat cuss’impresa resessida,
e siat solu un’iscena irreale
pro imbrogliare sa zente drommida.

Deo, umile miseru mortale,
prosigo a creare in sa sua innidesa
ca da monore bida l’apo tale

e bidea non giambo a sa etzesa.

3° classificato – Setzione Armando Pira – Poesia in rima - “Cuncursu ‘e poesia Sarda – Armando Pira” - Nuoro 2017

__________
S’ammaju de su poeta macumeresu pro sas ermosuras naturales chene tempus dat inoghe un’ateruna proa de validoria. Sa luna s’agatat dae miliones de annos, s’ómine l’at semper abbaidada cun ammiru e forsi no est lómpidu nemmancu a bi ponner sos pês subra. (Paolo Pillonca)