Tzertos mi naran ch'apo pagu briu
ca medas annos giuto a su fiancu:
ma deo 'e los contare fato a mancu
e sigo a caminare a passu frimmu
sena pretender ch'arrive su primu
mi cuntento ch'imbata su culiu.

Prosigo andare in su terrinu tostu
fin'arrivare a s'urtimu orizonte,
e cando a Deu ap'a essere de fronte
non b'at aer bisonzu chi mi pente
ca l'ischit su Divinu Onnipotente
chi mai passos tortos apo postu.

So sempre andadu in sa ereta via
fin'arrivare a custa bella edade,
su rispetu, s'amore s'onestade
e su suore infustu m'an sos chizos,
e sighidu apo semper sos cunsizos
chi mi daian babbu e marna mia,

sighidu apo de issos sa guida
sena torrare mai passu insegus,
sa fide sempre est andada cun megus
in tempus bonu che in tempus feu,
e torro milli gràzias a Deu
chi m'at acumpanzadu tota vida.

E a costazu meu ancora est como
c'an Deos dogni razza ogadu a pizu,
e Satana totue est a passizu
carrande zente a s'infernale abbissu,
ma non tenet s'azardu nemanch'issu
a ponner pé in su giannile 'e domo,

ca di' 'e note sun inie fissos
a mi fagher de ànghelos custodes,
fizos, fizas, nebodes, pronebodes,
a che frangher sas umbras dae coro,
e deo canto e giogo in mesu insoro
e pitzinnu mi parzo che a issos.

2° Premio sezione A poesia in rima - Al 26° Concorso di Poesia in Lingua sarda "Sant'Antoni de su o'u" - Mamoiada, 22 gennaio 2017