No m’assustat su tempus!
di Antonio Piras

No m’assustat su tempus! No m’assustas
cun sas tuas annadas traitoras,
cun sos tuos pinzellos chi coloras
custa vida de lambrigas infustas!

E non timo sos rajos solianos
ch’aframitzan sas àrridas campagnas,
ne sos sulidos fritos, cuddas ragnas
chi assutan ispiga, paza e ranos!

No m’assustat su tempus! No lu timo
ma l’afronto cun bramas e isetos
isperande de tenner sos afetos
de sos de domo chi tantu istimo!

Si mi pones sa domo in avolotu
no m’assusto, no timo, no m’ispanto
e finamentas a cant’agguanto
ti paro fronte, fin’a pilu drotu!

No m’assustat su tempus! Sas matanas
che a males e benes las iseto
e che frades e sorres las atzeto
totu sas novas, bonas e metzanas!

Sos ijerros comente sos beranos
e sos istios che-i sos atunzos
mi los istringo totu in custos punzos
che mezus seros e peus manzanos!

No m’assustat su tempus! Mi lu jogo,
lu carigno, l’ammajo, l’imbriago
e su calighe rànchidu che trago.
Ma s’isperas chi afoghe, no afogo!

Nde regolzo ‘e sa vida sos butios,
a cando caldos e a cando fritos.
Atzeto totu, gosos e atitos,
ma sos pius chi timo sun sos bios!