NO MI CREDENT

Mi cherent macu, prîte no mi creden’?
Mi cherent gasi, nant chi faco dolu
Cando lis naro: “Paschid’ hap’ in s’Eden!”,

Cando chin Venus pashidu so solu,
Chi m’ hana fatu corte tantas deas,
Et chin Icàru so pesad’ in bolu

Supra sa badhe sacr’ a sas Napeas,
Inue b’est su cadhu de Pegasu.
M’ hant allatadu cue sas Pegeas

Chin s’aba chi falavat da’ Parnasu,
Vivende de Castalia s’untana.
Mi davat Nausica calchi basu,

Et de sa printzipessa ispartana
Miravo sa bellesa ispantosa
De digna creatura suberana.

Sas trinas de Calipso, ninf’ hermosa,
De bùculos et lambrias ornadas,
Sos cavanos basavant d’una rosa:

Fint gos’ ‘e custas laras indurcadas
De su profum’ insoro; de nadura
Fint chin su lar’ ‘e Dafne coronadas.

D’Andromeda su änt’ ‘e s’ hermosura,
Ca li creschet bellesa chin Selene,
Mi restat sa vijone; tantu pura

Fit s’aba chi currìat s’Ippocrène
Inue jocaìant versos meos.
Penelope tessiata pro mene

A s’ora chi nde l’ischidavat Eos
Prenande s’Oriente de lucore.
Leadu a su monte de sos deos

Donadu m’ hat Pomona unu frore
Chi pretziadu hata sas sirenas
Chi cantad’ hant chin mecus a tenore.

Galanas si mustravant sas iscenas,
Ma tantu mi lu credent sol’ in pacos
Chi visitadu badhes hap’ amenas

Et ch’ hapo pren’ ‘e mendulas ses sacos,
Ma fint solu sas lacrimas de Filli”.
Si custa est manera d’esser macos,
Cada chentu berritas, semus milli.

Antonio Brundu