Nues andantanas
di Antonio Piras

Abbaidande sas nues andantanas
chi a lenu si moven in s’aera
mi dimando si b’at calchi manera
pro indruchire su tempus benidore,
si b’at calchi disignu ‘e su Signore
pro che catzare oriolos e matanas.

Istanote mi tocat cussa sorte
a sas primas caluras de s’istiu.
Sa conca mia paret unu riu
trazande pensamentos, ilbariada,
e tra una e s’àtera undada,
tocat ch’agguante e mi podere forte.

E mi passan a ‘e nanti poberitos
cun su famen in cara, istratzulados.
A s’ater’ala, bene tramudados,
che lis bessit in ojos sa richesa.
Cant’allegria, canta cuntentesa!
E cuddos… totu “ohis” e atitos!

Duos mundos divressos, a cuntrastu,
però fizos de Deus totucantos!
E ispozados de sos nostros mantos
un’a s’àteru semus uguales:
cando lassamos sas carres mortales
non si distinghet pira ne pirastu!

Però chie in vida meda acollet
dòminat, si la godit, si l’ispassat,
ei su poberitu no nd’incassat.
Tot’a un’ala pendet s’istadea!
Chie sa pagnotta la tenet intrea,
chie sa frafaruza nde regollet!

A d’ite ‘alet chi mi lee matana
sende custa una ‘oghe in su desertu?
Una non bastat! Nessi unu cuntzertu
a dare a sos “isprecos” evidèntzia,
chi si ponzet sa manu in sa cussèntzia
chie tenet bundante sa funtana!

………………………………………

Isparidas sas nues minetosas!
Torrat netu su chelu, tot’in d’una!
E sos isteddos torran, cun sa luna,
a che catzare custu malumore,
a dar’a s’isperàntzia unu lugore,
a tingher custas oras fastizosas!

Secondo Premio Sezione in Rima al Concorso di poesia sarda “Antoni Piludu” 2009 di Scano Montiferro