Passos
di Gonario Carta Brocca

Derrutu su cuile
che-i custos versos mios
a distempus:
boghe de metaforas d’irvaliu
in andalas d’afetos
e memoria
inue a passu lenu
trazo antigas visions
d’unu sonniu pitzinnu.

Custu cantare miu
sa lacana ‘e sos annos no aguantat
e in s’avantare perdet
tintinnos de sonazos
arvadas ruinzadas
e cudd’illampizada de foetes
truvande a Purpurinu
e Bucchiarvu.

Sa fantasia
elettronicos trastes l’ana ferta
e no allegat prus
chin sa ‘oghe ‘e sas janas
nen chi boghe de mortos
chi isticchìos iscusorzos
promintian.

Solu jeo
ne assiendau nen saviu
poeta chene oje e chene cras
ando ‘alu piccande una chimera
de gherreris de brunzu
rutos
ue sa paraula est morta.

Sas manos mias boidas
chen’asore
non mantenen cust’urtim’utopia
chi ponet alas
de noales visiones de amaju
e mi lassat in segus
che balladore
chi perdidu at su passu.

Menzione al Premio di poesia sarda "Barore Sassu" Banari 2010