Rundinella
di Antonio Maria Denti

Permitti rundinella
però sias fidada
e no mi sias ingrata e tirana
deo adoro un'istella
l'hapo in coro serrada
ma da sos ojos mios est lontana
puzone necessito
de andare t'invito
a bier nessi s'est allegra e sana
disponedi cun brios
a li leare sos saludos mios.

O rundinella mia
giughe cust'imbasciada
ma fidele mi sias e segreta
de funtana in sa via
faghes una girada
ista sigura l'agatas deretta
cumprende su dolore
rundine pro favore
anda e bola che una saetta
e cando che l'agatas
de s'imbasciada mia a issa trattas.

Puzone puntuale
tenzo tanta premura
faghe sa missione volenteri
mira a issa uguale
de trattu e d'ermosura
non bind'hat ateruna in Oniferi
incantadore visu
e in ojos s'accisu
cun sa mirada amore mi suggeri(t)
bionda e geniosa
de chentu fozas paret una rosa.

Sos ojos che istellas
li brillan dogn'istante
no podet esser custa rosa umana
ca sas Deas prus bellas
devotas e costante
l'adoran e rispettan che sovrana
sa bella Venus mia
cun sa mirada ebbia
su moribundu consolat e sana(t)
cun sa sua mirada
su coro mi hat traffittu che una ispada.

Narali notte e die
pro issa nde regiro
chi resister no poto su dolore
consolu dada a mie
cando s'iscrittu miro
ca cunsagradu m'had eternu amore
li daes cun impignu
s'abbrazzu e su carignu
chi dae coro li mandat fiore
bae fide mi presta
però cun sa risposta torra lestra.

De manzanu sas otto
sonadu hat su rellozu
sa rundine no est torrad'ancora
resistere non poto
penso e no hapo appozu
no esseret puzone traitora
ite si faghet cussu
ca leo s'archibussu
e da su mundu che la 'ogo a fora
sende gai pensende
bido sa rundinella chi est torrende.

Rundine delicada
sa puzone prus fida
deo no basto a ti ringraziare
comente ses andada
cominzami s'istoria contare
e senza cautela
rundinella m'isvela
gai sas penas mi podes calmare
nara rundine mia
l'has bida in domo sua o in sa via?

Bramosa e cun coraggiu
m'est passidu unu giogu
prite tottu hapo fattu volenteri
fatt'hapo su viaggiu
senza firmare in logu
e in pag'ora fio in Oniferi
senza fagher suspiru
m'hapo fatt'unu giru
abaidende in d-ogni cuarteri
tando firmo e m'accosto
in ue has nadu tue mi che imposto.

Ite bella fortuna
mi firmo in d'una gronda
gianna e balcones mirendemi fissa
e bido tott'in d'una
un'anghela bionda
tottu vestida a festa andende a missa
una oghe la jamat
su nomen sou isclamat
tando tra me pensosi custa est issa
abasso a su caminu
dae sa gronda e li fatto un'inchinu.

Bongiorno signorina
la prego 'e m'iscusare
si fatt'eo una simile azzardada
m'accurzio vicinu
c'hapo 'e la faeddare
ca pro issa m'han dadu un'imbasciada
trattenner no cheria
prite chie m'imbiat
isettat ansiosu sa torrada
est bisonzu 'e prevennere
prite tant'ora no poto trattennere.

Duas rigas mi diat
pro bi las cunsignare
e gai sind'allegrat poverinu
comente istat l'iscriat
si li podet calmare
su palpitu 'e su coro intro su sinu
daghi est prontu s'iscrittu
iscat chi a cuddu situ
devo torrare lestra e a puntinu
da chi torr'eo a bolu
pro issu meda mannu est su consolu.

La cherzo saludare,
la saludo in bisbigliu,
pronta fia a torrare Antoni cre
mi torrat a firmare
nendemi tranquigliu
bivat no bistet in penas pro me
ca mancari lontanu
dae sero a manzanu
prego pro issu su divinu Re
a mi lu cunservare
e cantu prima chi potat torrare.

Adiu novamente
ca mi nde devo andare
ca si fatto ritardu ite guai,
intantu frequente
no manco 'e bi torrare
ca tantu in paghe no mi lassat mai
tenede un oriolu
si fidi a modu a bolu
che diat benner ca t'amada assai
adiu la concludo
e cun affettu meda la saludo.