B'haiat in s'antigu un'alvuredu
de nughes bejas e ispianadu
da-e sas raighinas, b'han fundadu
cun s'andare 'e su tempus a Nughedu.

S'isterret subra de un'adde manna,
tra rabidas costeras: tres baddijos
la sulcan e dividin a ispijos
de montes coronada hat ogni gianna.

Intr' 'e sos montes chi li dan affogu,
un'orizonte liberu no hada:
paret un' 'ama de 'erveghes furada
e posta chi non s' 'idat da-e logu.

Fit prima d'esser bidda, de crabarzos
furriadorzos: umiles cuiles
a linna e frasca; che-i sos crabiles,
postos a faccia a sole e in roccarzos.

Pustis a trumas bi sun recuidos,
che lupos a sa tana da' ogn'ala,
zente rebelle e de idea mala:
cunfinados, ladrones e bandidos.

Tale fit tando, como est differente:
s'unda 'e su tempus muda hat cancelladu,
de s'antigu ogni istiga e cambiadu
ogni fisionomia, indule e zente.

In d'una notte niedda che mura
e tempestosa, in tantu attrighentu,
in cussu logu naschida hapo tentu
e ue ispero de haer sepultura.