Su giogu de sos sentidos
di Minnia Pani

Che giobu mi torran sos ammentos
Ligados a chizones de carignos
Cun alzolas bramadas de designos
A lòrumos de vida cun eventos
E mi cummovene cussos mamentos
Apojulados mi lassan sos signos.

E sun custos sos lidos solianos
Intr’ ‘e pijas intostan sos sentidos
De ispijos de lughe sun bestidos
Che tàpulos cuados fittianos
Ammadrigo bisos giogulanos
Ma girana liados istanzidos.

Ma cun sas alas de su pensamentu
Bogas a pizu prègio cun bideas
A fiotos istrinas de peleas
Ninnende su coragg’ in sentimentu:
si sa carena ‘enit a s’ intentu
isolves giuales e trabeas.

Su sentidu mi giogat che faru
Intro sa mente cummovet su coro
Mi ponet briu cando l’assaboro
Che fadu ladinu bellu giaru
Atzesu che titone a mie m’ est caru
L’afianzo che tupa de tesoro.

E tando chircas àteras lumeras
Che sienda ninnàda cun amore
Furas a sos isteddos su lugore
E sa luna chi est sa cussizera
Chircas unu cussizu, una chimera
Faschendemi s’intragna de sabore.

Su sentidu est s’ umana richesa
Su ch’ amus intesu, ‘idu, toccadu
Tottu su ch’at sa mente marghinadu
Banzigat che rebuddos de bellesa
cun s’ edade non morit a betzesa
e ninnat su present’ e su passadu.

Sos chi duran sun solu sos turmentos
Sas allegrias un’iscuta ebbia
Tand’ in s’ intragna brillat s’ armonia:
cust’ est su giogu de sos sentimentos!

MENTZIONE DE ONORE /2008/ TEMA: “SU GIOGU DE SOS SENTIDOS PREMIU LOGUDORO