Deus ti salvet Maria
chi ses de gratzia piena
in custa quarantena
morit sa zente.

O Deus Onnipotente
su populu at pregadu
pro chi siat preservadu
dae custu male.

Virgine Immaculada
isculta sa preghiera
de sa zente sinzera
chi a tie onorat.

Beneitta e laudada
profumada che rosa
mama nostra diciosa
frimma su “viru”.

Beneittu su fiore
profumu ‘e gelsominu
Gesus fiore divinu
a nois isculta.

Poberos pecadores
dimandamus perdonu
dade nos, Fizu ‘onu
su ‘ostru amparu.

Padre, ti supplicamus
dae su fundu ‘e su coro
chi una gratzia ‘e oro
nos contzedas.

E a tie Mama gloriosa
un’oratzione ebbia
dae custa pandemia
a nois salva.

Bellesa pura e rara
in sa ultima ora
abbèri nos Segnora
su Paradisu.

agosto 2020