43^ Edizione del premio Logudoro Ozieri.

VERBALE DE SA GIURIA

Saludu e trigu a totu e a dognunu

Su trinta ‘e triulas de su 2024, a sas battor de sero, in sa sede de su Premiu Logudoro, organizadu dae su Sodalitziu Culturale Otieresu Pirastru-Cubeddu-Morittu, sede istituscionale posta a nou, chi s’Amministrascione Cumonale de Otieri, in sa pessona ‘e su Sindigu Marco Peralta nos at cussignadu, sa die de sa premiascione de sa ‘e barantaduas edisciones (totu su primu pianu de su Palatu Pietri, unu palatu istoricu de Otieri), hat fattu s’abboju sa Giuria de su Premiu Logudoro pro su chirriu de sas oberas piùs cumpridas de sa ‘e barantatres edisciones pro s’atribbuimentu ‘e sos premios.

Fin presentes Gavinu Contu chi est finas su presidente de su Sodalitziu, Nino Arras, Franca Cherveddu; Francesco Cossu, segretariu ‘e sa Giuria, Martino Meloni; Amelia Pericu, Giuseppe Soddu e Sandra Zambolin. Non fit presente Tonino Langiu, un’otieresu chi ch’istat Casteddu (s’edade ei su saludu non li premmitit piùs de si ponner in viaggiu), chi hat imbiadu in litera sas medidas suas subra a dogni òbera in cuncursu.

Innanti ‘e comintzare a isaminare sas òberas, Gavino Contu, presidente de su Sodalitziu Culturale hat dadu uficialidade a sa nomina de su presidente nou de sa Giuria, Giuseppe Soddu chi, pro annos meda nd’aiat già fattu parte. Giuseppe Soddu est nebode e istudiosu de sa vida e de s’òbera de Pedru Casu, professore de Lettere e pustis preside in iscolas de Sardigna e de Milanu.

In calidade de presidente, innanti ‘e totu hat cufrimmadu a Franziscu Cossu in su ruolu de segretariu de sa Giuria, posca hat chefidu intender totu sos giurados pro chi nos esseremus postos de acordu sura a sos criterios de sighire pro su chirriu, s’analizu, su cunfrontu e su dessignu de sa graduatoria de sas òberas de premiare.

Amus comintzadu dae sa Setzione Musserradu Meridda, de sa Poesia a tema impostu, in Logudoresu o simizante e in d’una mètrica ‘e su connottu, posca amus sighidu cun sa setzione Sevadore Bertulu de sa Poesia a tema liberu e a ultimu cun sa setzione Gigi Sotgia de sos Contos noos.
Una cosa chi nos istat a coro de nàrrere est chi pro a nois de su Premiu Logudoro, sa grafia dezzisa dae sos autores est “sacra”, dae annos meda. Si, in su tempus, cherimus cumprèndere e medire s’andanta ‘e sa grafia, bisonzat de àere s’iscritura originale de chie su sardu l’iscriet addeabberu e no lu teorizat ebbia.

POESIA IN RIMA A TEMA IMPOSTU

Ite coro gighimus
Setzione «Musseradu Meridda»

Custa setzione in su Premiu Logudoro ch’est dae cando est naschidu su Premiu chi, a s’incomintzu, si naraiat Sodaliziu Culturale Otieresu – Trofeu Poetas Otieresos Pirastru-Cubeddu-Morittu e chi, in su 1992, sos organizadores de tando (presidente fit Cicitu Multinu e segretariu Carmelo Demartis), lu jamein Premiu Logudoro, pro narrer chi su Premiu no rapresentat a Otieri ebbia ma un’istèrrida ‘e iddas inue si faeddat in Logudoresu, e, in piùs, at rapresentadu pro piùs de battor seculos, tota sa limba sarda, comente eniat giamadu su.

10

Logudoresu chi, finas a mesania de su Noighentos, fit sa limba de guasi tota sa literadura in Sardigna.

Pro annos meda, in su Premiu Logudoro ba’t àpidu una setzione ebbia: Poesia a tema inpostu in Logudoresu o simizante, in rima e in d’una mètrica de su connottu. In sos annos si b’at aggiantu àteras seziones.

Su tema de ocannu est custu: Ite coro gighimus.

Sas òberas piùs bonas sun atesu addeabberu dae s’improvisascione poetica de sos cantonalzos de s’Ottighentos e dae sos improvisadores de palcu che a Cubeddu, Pirastru e Morittu; podimus nàrrer cun sigurìa chi sun poesias a taulinu, de pinna e de meditascione, comente semus abetuados a las bìdere dae sos cuncursos piùs antigos chi han àpidu e an ancora una durada longa: su Premiu Otieri su Premiu Logudoro, isse puru de Otieri.

Chirriadas sas poesias pius prezziadas e cussideradas in gradu de poder cumpeter pro sos premios, segundu sa medida de ogni giuradu, sun istadas analizadas e cunfrontadas, ponzende in mustra sos puntos fortes dae su puntu ‘e vista poeticu e, simai, calchi difetu o puntu debbile in sa fattura ‘e s’òbera e finas in sa mètrica.

Sa Giuria, a cuncordu pienu, at dadu sa pramma de su inchidore a Pier Giuseppe Branca, de Cheremule, chi ch’istat in Tatari, pro s’òbera Frailes de suaes cantones.

Metro: tertzina undighisìllabu, inue sa rima, de imbentu sou, de Pier Giuseppe Branca, est azigu diferente dae sa tertzina dantesca: tertzina branchesca, la tiamus dever giamare.

Addaisegus de custos versos b’at una cultura manna, una connoschenscia funguda de sa poesia italiana e furistera e in particulare de Dante, e b’at istudiu e maestria manna sestendelos, sos versos, e ponzendelos in seju. Finas in cust’obera ‘e arte s’iscumproat sa capazzidade de s’autore de manizare sas peràulas, sa limba ei su limbazu poeticu. Su seberu ‘e sas peraulas, sas màzines, sos pessamentos poeticos, su riferimentu a s’atualidade, su limbazu, chi si distinghet dae cussu de calesisiat àteru poeta sardu, fattendesi reconnòschere, sun addeabberu istraordinarios.

Su ‘e duos premios si l’at balanzadu Tonino Fancello, de Dorgali, pro sa poesia Mariposa.

Metro: sestina undighisìllabu a rima serràda.

Sos sentidos ei sos pessamentos chi jighet in su coro de babbu, mirende sa fiza chi est creschende che fiore, e s’est acerende a sas ghennas de sa vida, sun pintados cun immagines poeticas meravizosas. Sos bolos de sa fantasia e sos paragones bellos meda dan fromma a unu limbazu cumpridu, delicadu e de efettu.

Su ‘e tres premios es andadu a Angelo Lombardo, de Otieri, pro sa poesia Ite coro gighimus.

Metro: sestina undighisìllabu a rima serràda.

S’òbera de Angelo Lombardo manifestat una chirca cuidadosa in su manizu ‘e su limbazu. Sa Giuria, pretziende cust’oriolu, at dezzisu de li attribuire custu reconnoschimentu importante.

11

S’Ottava Bella si l’at balanzada Luca Meledina, de Otieri, cun sa poesia Ite coro amus?;

metro: ottava reale. Tra risponder sibillinu, nende guasi nudda, su poeta seberat de nde ogare a pizu su bellu chi gighimus in sos sentidos, cantende “sa bellesa / De coros ‘ue abbundat sa ricchesa” e ponzende a un’ala su feu e su malu de sa vida. Chimbe ottavas pienas, cun d’una serràda digna de sos mastros mannos a sos cales est intregadu custu Cuncursu poeticu: Pirastru, Cubeddu e Morittu.

Pro sa bellesa ‘e sos versos, pro sa creatividade, su manizu ‘e sa limba, sos pessamentos poeticos, su valore de sas òberas e pro sa prezzisione mètrica at dessignadu de dare tres Mentziones de onore a:

Domenico Angelo Fadda, de Thiesi, pro sa poesia Ite coro gighimus;

Gino Farris, de Lodè, chi ch’istat in Nuoro, pro sa poesia Coro ‘e preta;

Vittorio Sini, de Benetutti, chi istat in Otieri, pro sa poesia Ite coro giughimus.

POESIA A TEMA LIBERU

Setzione «Sevadore Bertulu»

Sos poetas chi an cuncùrridu a sa Setzione Poesia a tema liberu sun istados trintunu.

Finas pro custas òberas sos premios sun istados dessignados a cuncordu pienu.

Sa pramma de su inchidore si l’at balanzada Andrea Muzzeddu, de Tempio Pausania, chi ch’istat in Aggius, cun sa poesia Umanitài zilcu.

Un’òbera ‘e arte pessàda e parturida in muta ona, custa de Andrea Muzzeddu, funguda in sos pessamentos e manifestascione de una sensibbilidade poetica e umana de valore. Già su titulu narat cosa meda. Tra sonnios e realidade, cun versos musicales ponet in sestu unu cumponimentu meravizosu chi olat in sas chimas altas de sa poesia.

Su ‘e duos premios est istadu atribbuidu a Gian Gavino Vasco, de Bortigali, pro sa poesia Cun sa lughe atzesa. Metro undighina lira undighisìllabu a rima serràda cun d’una serràda in quarta lira, pro no che jampare sos baranta versos cussentidos dae su bandu.

Sas cantones in lira an su donu de dare musicalidade e armonia a sos versos, cando sunu postos in seju dae unu mastru ‘e poesia che a Gian Gavino Vasco.

In sos tempos malos e feos chi semus atraessende, custa lirica bella abbiat sos disizos, sas isperas e sos sonnios de lughe e de paghe de sa mazore parte ‘e sa zente. Nd’amus bisonzu mannu.

Su ‘e tres premios a Maurizio Brianda, de Berchidda, pro sa poesia Impudos.

Poeta giovaneddu, Maurizio Brianda est sa ‘e duas bias chi est cuncurrende a su Premiu Logudoro, comintzende dae ocannu passadu. In pagos versos, -barantachimbe peràulas in totu-, su poeta resessit a narrer cosas importantes, ponzende in sestu sentidos fungudos, manifestende una chirca limbistiga e unu seberu interessante meda de paràulas.

Leende in cussideru su livellu altu de poesias meda, sos argumentos tratados, signu de sensibbilidade, de fortza, de finesa poetica e finas de impignu tzivile chi abbiat isperas e disizos ammajadores, sa Giuria at dezzisu de dare chimbe Mentziones de onore a:

Pietro Delogu, de Orune, chi ch’istat in Nuoro, pro sa poesia Ghiddighìa;

a Manuela Orrù, de Serramanna, pro sa poesia Sorris;

a Costantino Sanna, de Orune, chi ch’istat in Lei, pro sa poesia Sardigna lunare;

a Giuseppe Tirotto, de Casteddusardu, pro sa poesia Bòidda la notti…

12

CONTOS NOOS

Setzione «Gigi Sotgia»

In sos contos de ocannu si podet nàrrere chi non bei nd’at àpidu unu chi podiat esser cussuideradu su mezus de totu, Est difizzile finas a nàrrere chi b’apat òberas mannas de arte. Su livellu mediu est resultadu azigu piùs iscassu cufromma a sos ultimos annos. Dae s’analizu ‘e sos contos, lassende passare in segund’ordine calchi puntu debbile chi riguardat presempiu s’iscritura, chi in divescios casos no iscurret liera liera, ma restat azigu areste pagu armonica e pagu musicale, a tales chi no est istadu nemmancu fazzile a dessignare sa pramma ‘e su inchidore. Parte manna de sos giurados an tentu contu tando de sas temas tratados, piùs che de sa manera in sas cales sun isterridos.

Su primu premiu est istadu atribbuidu a un’autore chi no ch’aiat cuncùrridu mai, a Franco Soggiu, de Oristanis, pro su contu S’amore de una mama. Sa trama est bona meda, finas si s’istèrrida ei su seju chi nde resultat podiat esser contivizadu piùs cun cabu.

Narat de unu fizu chi no est nàschidu mai pro more de sas pregadorias de una mama chi no cheriat chi, naschende, custu fizu, si ch’esserat mortu de su famine, pro sa cundisciones aconomicas de sa familia. Sa Giuria l’at premiadu piusdetotu pro su valore morale de su contu.

Su ‘e duos premios est andadu a Sebastiano Mario Fiori, de Posada, chi ch’istat in Tortolì, pro su contu Pro su restu de sa vida.

Su protagonista, un’ergastolanu liberadu pro “bona cunduta” ch’enit leadu dae mesuia dae una macchina, apenas bessidu dae presone. In s’ispidale iscoberit chi unu ‘e sos dutores est fizu sou e chi no l’aiat bidu mai. Contzadu male e giaitadu a su lettu, pedit perdonu a su fizu pro no esser istadu unu babbu comente aiat devidu èssere. Finas si su contu est sestadu ene in dogni tretu, est presente calchi pecu in sa sintassi inue sas regulas non currisponden in totu a s’assentu ‘e sas peràulas de sa limba sarda.

Su ‘e tres premios est andadu a Giovanni Piredda, de Calangianus, pro su contu La stria.

Su contu est iscritu mezus de sos àteros, resultat però pius lezereddu in sa sustascia cufromma a sos primos duos.

Ai cust’autore l’aggradan sas “paristorias” chi si contaian una olta a carre a su fighile, chi naraian de cosas de fantasia, totu faulas, chi però si contaian comente chi esseran istadas suzzessas addeabberu. B’aiat zente meda chi las leaiat pro bonas e si las creiat. Su faeddu gadduresu est manizadu cun maestria.

Duas Mentziones de onore sun istadas atribbuidas a:

Pietrinu Monni, de Orune, chi ch’istat in Lei, pro su contu Su funtaneri de Dorolai;

Pietro Pala, de Nuoro, pro su contu Toncas e gattos nigheddos.

La premiazione si terrà il 5 ottobre ad Ozieri, nel salone delle Conferenze dell'AGRIS Sardegna, in Piazza Duchessa Borgia, dalle ore 16.
La premiazione della Sezione ISCOLAS si terrà in data da stabilire nei primi mesi del 2025.