Ti ringrazio, Foricu, ‘e su gentile
modu chi sos saludos mi nd’ imbias,
ammentandedi de sas rimas mias
in sa “Noa” de su trinta ‘e abrile.

De ue in s’ edade giovanile
sas oras pius bellas passaias,
paret ch’ ismentigadu non ti sias
ca non ses pro sa mama fizu ostile.

De sa terra chi ses naschidu, mai,
ca troppu l’ as amore, non t’ olvidas,
pro chi che vivas da’ issa lontanu.

Ah!, si poteras, torra in custu eranu
a cuntemplare sas baddes fioridas
dae sos oros de Tirsu a Palai!