1

Gianni Pisanu, su segundu sese
Piscamu chi a Bolotana l’ onoras;
troppu solennes sunu custas oras
de abrile sa die vintisese
de s’ annu settantotto, in custu mese
riccu de luminosas auroras:
pro te, cun zerimonia commovente
ispuntat s’ aurora pius lughente.

2

De duos nd’ est Bolotana fiera,
bos onorat sa patria nadìa;
chent’ annos faghet Monsignor Filia
Piscamu dignu fit de s’ Alighera;
tue, da’ Logudoro a sa Costera,
ses su pastore nou, bona ghia!
Ammittinde la sese volonteri
sa Diocesi bella de Otieri.

3

Cumprida Baggiu l’ at, su Cardinale
chi de Sardigna est amigu veru,
cun dogni ritu sacru, ogni misteru,
sa cunsagrazione Episcopale;
dae totu su vastu piazzale
s’ intendet un’ applausu sinzeru
in onore a su Piscamu novellu:
custu est s’ auguriu pius bellu.

4

Mentres de auguriu su asu
in cust’ istante ti lu sunu dande,
a sa Diocesi tua ses pensande
ch’ est dominada dae Monte Rasu;
dae sa commozzione ses invasu,
sas lagrimas si biden’ ispuntande,
però non sunu lagrimas de dolu
ma lagrimas chi tenene consolu.

5

In cust’ istante faghes sa prommissa
d’ esser dignu de sa noa dimora;
pro sos diocesanos paghe implora
in dogni preiga e in dogni missa;
sa peraula tua siat issa
de sos afflittos sa consoladora:
usa sa cristiana caridade
comente tenes sa capazzidade.

6

Su male ch’ este in maneras varias
in cust’ edade chi la crèn zivile,
su mazzone pro s’ arte sua vile
tuccat dae sas tanas solitarias,
faghe chi sas berbeghes perdularias
torrene totu a su tou cuile:
s’ aidu lis abberi e las cumprende
sos lamentosos belidos intende.

7

Como medas poetas sardignolos
cantare dene pro Gianni Pisanu;
deo, comente tou paesanu,
a sos istranzos non los lasso solos;
ti auguro pius altos bolos
già chi ancora non ses’ anzianu:
arrives a sa meta puntuale,
si Paba nò, ma bonu Cardinale.

Bolotana, 26 de abrile 1978