Sole, ses tramontande a s’ orizonte
a pustis chi sa die l’ as azzesa;
ti che cuas a palas de su monte,
non t’ est possibile a fagher trattesa.

Deo puru forzosu est chi tramonte,
sa vida mia ch’ est bell’ e ispesa,
trista l’ inchino sa pensosa fronte
sutta su grave pesu ‘e sa ezzesa.

Tue tramontas, però cras manzanu
ispuntas dae nou luminosu
sighis su cursu tuo fittianu;

ma su tramontu meu est pius penosu,
cando ch’ abbasso pianu pianu
in campusantu ap’ aer su riposu.

======

Ue sos rajos tuos sunu ruttos
sun bistados da’ totu beneittos,
c’ as iscaldidu sos omines frittos
e fattu ammadurare tantos fruttos.

Privu pass’ eo de bonos attributos
in sos iscurigores pius fittos,
essende unu de sos poberittos
chi rimpiantu non lasso e né luttos.

Sos omines a tie ti disizana
ca consolu lis donas e recreu,
ispuntas e tramontas triunfante.

Ma troppu pagos sun sos chi s’ abbizana
in custa vida ‘e su passaggiu meu
ca un’ essere sò pagu importante.