1

Cando in sos vint’ annos est sa vida
est piena de briu e allegria,
invece deo custa vida mia
la sò passande sempre addolorida;
dae cando apo fattu sa naschìda
sò privu de sa lughe giara e bia:
send’ in mesu de tantu iscurigore
m’ est intimu cumpanzu su dolore.

2

Naran chi bellu est su firmamentu
in sa notte cobertu de istellas,
chi totu luminosas sunu e bellas
e si poden contare a chentu a chentu;
eternu est s’ insoro movimentu
e totu sas passadas parentellas,
dae cando s’ est s’ omine connotu,
ispantadas si sun de custu motu.

3

Chi su poeta cantad’ e onorada
naran ch’ est s’ aurora bell’ assai;
est un’ incantu comente l’ indorada
s’ alta chima de su monte Palai:
solu a mie m’ attristat e m’ accorada
ca non la poto cuntemplare mai
cussa meravizosa visione,
la ido cun s’ immaginassione.

4

Su sole luminosu in s’ oriente
naran chi su manzanu si presentada,
s’ iscuru de sa notte l’ annientada
cun dogni raju sou risplendente;
non l’ ido, mi abbizo solamente
comente mi recreat e cheghentada
custa persone mia addolorida:
mi faghet bene pro chi non lu ida

5

Nde sunu privos custos ojos mios
de ider sos lontanos orizontes,
sas chimas maestosas de sos montes
u’ est totu recreu in sos istios,
sas abbas cristallinas de sos rios
falande in pianuras e in pontes:
non las bido sas abbas cristallinas
pasidas arrivende a sas marinas.

6

Las intendo sas dulches melodias
de sos puzones, como chi est beranu;
dae s’ adde ighina, ogni manzanu
nd’ enit su cantu a sas origias mias;
comente sulcan sas celestes vias
bolende a trumas cun bolu galanu,
de sas alas sa muida l’ intendo
e cantu sun felices lu cumprendo.

7

Cando su chelu no est prus serenu
ma bi at nues cun iscurigores,
tando, formadu de sette colores,
presentare si det s’ arcobalenu;
deo chi sò de tenebras pienu
non los bido sos suos risplendores:
pro me b’ est su nieddu solamente,
non nd’ esistit colore differente.

8

Ahi! Cale cuntentu mi procuro!
Cale alliviu limba mia imploras!
Sa notte mia no est doigh’ oras
ma est notte chi durat cantu duro;
che-i sa vista, su coro mi oscuro,
non b’ at tramontos e né auroras
pro me, chi sò in fissa disfortuna,
né nottes illuminadas dae sa luna.

9

Cantos poberos b’ at chi si lamentana
ca non faghen peruna conquista;
lu possedin su bene de sa vista
eppuru mancu gai si cuntentana;
si custa pena mia isperimentana
tando passan’ abberu vida trista!
Cando mai sas dies tranquillas
non passat chie at sanas sas pupillas?

10

Non nde passao de penas amaras
s’ est chi sana sa vista possedia:
poder dare unu asu a mamma mia,
mirandeli sa vista, cun sas laras;
totu abbrazzare sas persones caras
chissà cale cuntentu proaia!
Privu de custos oscuros abissos
issos mirende a mie e deo a issos.

11

Sos nuraghes, monumentos antigos,
visitare non poto a sa sola;
a su nuraghe de “Tittirriola”
mi nd’ an pigadu sos mios amigos;
si sun fattos pro paghe o pro intrigos
accertadu non l’ at perun’ iscola:
pensend’ in millenarios cuntrastos,
los tocco e non los bido custos crastos.

12

In sa chima ‘e Palai maestosa
oe m’ agato chi est die giara;
Gennargentu si bidet e Limbara,
sos mares d’ Oristanis e de Bosa;
sa Sardigna chi est meravizosa
deo non l’ ido, ite pen’ amara!
Sos ch’ an sa vista tra issos allegana
e cantu iden a mie l’ ispiegana.

13

Frequente che pigo a cust’ altura
pro respirare sanas sas aeras,
inoghe buffo sas abbas lezeras,
de sos buscos mi godo sa friscura;
non cuntemplo però, pro disaura,
altipianos, baddes e costeras:
realizare non poto sa brama
d’ ider s’ incantu ‘e custu panorama.

14

De Ortachis in s’ abba cristallina
b’ apo buffadu e mi sò infustu;
non ti bido Maria de Mesaustu
chi ti nd’ an postu in custa raina:
a tie m’ invoco che mama divina
s’ est chi leare mi che podes custu
iscurigore, ca potente sese,
de te imbenugiandemi a sos pèse.

15

Isco, Maria, tue podes meda
che mama de s’ intrea umanidade;
nemmancu tue l’as sa facultade
mancari custa grazia chi ti peda,
ma cunzedimi nessi chi posseda
sa lughe vera de s’ eternidade.
No ap’ a esser in eternu puru
cundennadu de viver a s’ iscuru!