Isterrida

Su grande fizu de Filippu Segundu,
Alessandru, conchistat un’ imperu
ue mai su sole non tramontada;
in sos seculos totu in custu mundu
s’ umile no est tentu in cunsideru,
sa potenzia sola est sa chi contada.
Umiliadu su poveru s’ attontada
sende dae ognunu abbandonadu,
non nde tenet de calculu perunu
né in s’ istoria nde faghen annoveru.
Umiliadu s’ attontat su poveru
sende dae ognunu abbandonadu;
su poveru s’ attontat umiliadu
sende abbandonadu dae ognunu,
non nde tenet de calculu perunu
né nde faghen annoveru in s’ istoria.
S’ innalzat Isidoro a tanta gloria
ca de Cristos sa fide no affalzada,
si est distintu in cussos tempos tristos
solu fattende una vida santa.
S’ innalzat Isidoro a gloria tanta
ca de Cristos sa fide no affalzada;
a tanta gloria Isidoro s’ innalzada
ca no affalzat sa fide de Cristos,
si est distintu in cussos tempos tristos
solu santa fattendela una vida;
sa rughe est s’ arma sua preferida
istendardu divinu de amore.

Primu fiore

De s’ immensa ischiera est protettore
chi tenen sa pius fea ricumpensa,
ca no est riconnota sa pelèa
tortos supportan de ogni manera.
Est protettore de s’ immensa ischiera
chi tenen sa pius fea ricumpensa,
est protettore de s’ ischiera immensa
chi tenen sa ricumpensa pius fea,

ca no est riconnota sa pelèa
d’ ogni manera tortos nde supportana
e solu in sa fide si cunfortana
cudda ch’ at cunfortadu a Isidoro.
Pro su sublime sacrifiziu insoro,
sos umiles massaggios chissà cantos
de sos chi an peleadu in sas arzolas
den’ esser’ in su chelu grande santos,
incoronados de aureòlas
in meritu ‘e sas penas chi patiana,
mancari pro su mundu si che siana
trazados dae sas undas de s’ obliu;
beneittu ‘e suore est donzi uttiu
chi an versadu subra su terrinu.

Segunda retroga

Su grande fizu de Filippu Segundu…
…istendardu de amore divinu.

Segundu fiore

Unu ebbia non fit su contadinu,
ma pro sa maggioranzia issos sunu
sos ch’ in sa fide tenen s’ isperanzia
ch’ aman e usan sa pregadoria.
Su contadinu non fit un’ ebbia
ma pro sa maggioranzia issos sunu;
su contadinu ebbia non fit unu
ma issos sunu pro sa maggioranzia,
sos ch’ in sa fide tenen s’ isperanzia
chi sa pregadoria aman e usana.
De s’ intender sa missa non ricusana
e non ricusan de sos sacramentos.
Cando contrarios an sos elementos
cun s’ andamentu de dogn’ istagione
cun sas annadas dae mal’ in peus,
non s’ isfogana issos in lamentos,
ma esclamana cun rassegnazione:
“Fatta siat sa volontad’ ‘e Deus!”
Cando lis benit un’ annada mala,

isperande chi nd’ enzat una ona
ponen in motu attrezzos de ferru,

bessin de nou cun su zappu a pala
fertile pro la render dogni zona
in s’ attunzu novellu, e de s’ jerru
affrontana sas rigorosas dies
de bentos biddiarzos e de nies
e de s’ istiu su torridu cardu.

Urtima retroga

Su grande fizu de Filippu Segundu…
…de amore divinu istendardu.

Urtimu fiore

Venerat a tie su populu sardu
ca veramente cun fiducia isperada
chi non s’ eternet s’ istadu presente
ma bona la connoscat calchi die.
Su populu sardu venerat a tie
ca veramente cun fiducia isperada;
a tie su populu sardu venerada
ca cun fiducia isperat veramente
chi non s’ eternet s’ istadu presente
ma la connoscat calchi die ona.
Trasformada chi siat dogni zona
chi solu da’ erbeghes com’ est paschida;
si attuet su “Pianu de Rinaschida”
dae su Logudoro a Campidanu;
de rinaschida s’ attuet su pianu
dae su Campidanu a Logudoro,
cun s’ abba de su lagu ‘e su Taloro
totu sos campos nostros los irrighene,
pro chi sos trigos crescan e ispighene
cun sede sanu e in color’ ‘e oro.
Si avviet sa provincia de Nuòro
verso d’ ogni moderna conquista;
de delinquenzia sa piae trista
si trasformet in vida onesta e seria,
sos campos in colore de miseria

si muden in colore de benessere
a tie Isidoro pro intessere
nois poetas versos pius bellos,
cantanded’ in ottavas e in modellos
versos chi sian laudes e innos,
primma d’ esser adultos sos pizzinnos
chi sunu iscurtande custa gara.
A Bolotana nostra tue ampara
chi tenzat sempre prospera fortuna,
in dogni attividade fiorente
siat unu terrestre paradisu;
senza ch’ aer discordia peruna
che regnet solu sa paghe e su risu,
vivat in fratellanzia sa zente.

A Comitadu e a Presidente
chi l’ ana custa festa organizada,
rendelis sa fadiga cumpensada
ogni grazia cuncedi e ogni bene,
cunform’ a su meritu a issos tene
sempre sutta su tou patrociniu.
Si avveret su meu vaticiniu
comente ti lu prego dae coro;
beneighe, oh santu Isidoro,
in sas famiglias minores e mannos
chi non devien da’ sa via giusta
e de festas solennes che-i custa
chi nde fettan ancora a medas annos.

Bolotana, 11 maggiu 1961