Isterrida

Sas vittorias chi Napoleone
conquistadu at in dogni gherra
ite sunu a cunfrontu de Isidoro?
Cuddu cun dun’ ingorda passione
si cheret fagher padronu ‘e sa terra,
custu su chelu tenet in su coro.
Sun sas ispigas in color’ ‘e oro
sa ricumpensa a sas suas fadigas,
non nde disizat de ricchesa immensa,
li bastat chi l’ avveret su laore.
Sun sas ispigas de oro in colore
sa ricumpensa a sas suas fadigas;
sun in color’ ‘e oro sas ispigas
a sas suas fadigas ricumpensa,
non nde disizat de ricchesa immensa
li bastat su laore chi l’ avverede.
Napoleone at brama ch’ imperede
dae sa Russia finas a s’ Egittu,
at tantas naziones isconfittu
però glorias sunu passizeras;
Isidoro mirende sas aeras
s’ imperu conquistat pius vastu
cando imbrenugadu in dunu crastu
rezitat una santa orazione.

Primu fiore

Aspirat a s’ eterna salvazione
sos massaggios a issu los attirada
sos cales sempre l’ ana resu omaggios
in sa passada era e in sa moderna.
Aspirada a sa salvazione eterna
sos massaggios a issu los attirada;
a sa salvazione eterna aspirada
a issu los attirat sos massaggios,
sos cales sempre l’ ana resu omaggios
in sa moderna era e in sa passada.
Sende in vida, de santu proas dada,
pro sos prodigios suos e portentos

l’ invocada sa zente peccadora;
dae cando sa terra l’ at lassada
annos che nd’ at passadu già ottighentos
eppuru veneradu enit ancora:
In custa nostra rurale dimora
lu pregat sa credente moltitudine,
diffficilmente sa consuetudine
de lu festare at a benner infranta.

Segunda retroga

Sas vittorias chi Napoleone…
…rezitat un’ orazione santa.

Segundu fiore

Coltivat da’ s’ attunzu sa pianta,
in beranu cun briu si ravvivada
e da poi la messad’ in s’ istiu
cun sos mannuggios pesantes che brunzu.
Sa pianta coltivat in s’ attunzu
in beranu cun briu si ravvivada;
sa pianta in s’ attunzu coltivada
in beranu si ravvivat cun briu
e da poi la messat in s’ istiu
cun sos mannuggios che brunzu pesantes.
Isidoro alternat sos istantes
de su tribagliu cun sa preghiera,
Napoleone s’ armada fiera
l’ ischierat de fronte a su nemigu
semenande sa morte paret lampos.
Isidoro sa pius vasta ischiera
la guidat a semenare trigu
sa bundanzia pro b’ esser in sos campos.
In sas piantas penden da’ sos rampos
sos saboridos e maduros fruttos,
ma in sos campos de battaglia ruttos
giovanos sunu in sa bella edade
e nde restat sa trista umanidade
cun disisperu e cun mala fortuna.

Urtima retroga

Sas vittorias chi Napoleone…
…rezitat santa orazione una.

Urtimu fiore

Mamas, isposas cun sa este bruna
lassana de sas gherras sas fiamas,
ca sos conflittos inue bi passana
distruen totu,persones e cosas.
In beste bruna mamas e isposas
lassana de sas gherras sas fiamas;
in beste bruna isposas e mamas
sas fiamas de sas gherras lassana,
ca sos conflittos inue bi passana
distruen totu, cosas e persones.

Pro evitare sas distruziones
a Isidoro diana imitare;
sas distruziones pro las evitare
a Isidoro imitare diana,
sos chi su mundu guvernan e ghiana
s’ esercitu moan de sos contadinos,
pro fecundare totu sos terrinos
chi finas troppu sun abbandonados,
in modu ch’ apan sos diseredados
su pane, de sas mensas su profumu,
inveces de lis dare fogu e fumu
in conflittos inutiles, balordos,
chi, provocados dae sos ingordos,
nd’ atin su cataclisma universale.

S’ est chi la faghen sa gherra attuale
no at a esser una gherra omerica;
inveces custa nostra terra isferica
de la reduer a unu furraghe,
s’ adoperen in operas de paghe
sos bloccos de sa Russia e de s’ America,
comente in sa penisola iberica
Isidoro de paghe est messazeri.

Isidoro, ch’ espertu marineri,
su mundu salva da’ ogni tempesta;
aggiua cuddos chi pro custa festa
offertu ana generosamente,
assisti custu populu credente
chi custas dies tantu ti at pregadu.
Beneighe s’ attivu Comitadu
cun su sou alacre Presidente.
A sos afflittos cunforta e consola
duncas gridemus totu a bonu coro,
evviva, evviva pro santu Isidoro,
evviva puru pro Nino Dedola;
sa manu tua totu beneigada,
pro medas annos custa festa sigada.

1966