Sa primavera
di Costantino Longu

Torrad’ est s’ istagione ‘e sos amores,
de gaudios, d’ allegrias e cuntentos;
a sas campagnas amenas, sos fiores
renden deliziosos ornamentos.

Sos puzones allegran sos albores
cun sos armoniosissimos cuncentos,
su chel’ azurru est totu risplendores,
lieve andat sa frina de sos bentos.

Torrad’ est s’ istagione fiorida,
piena de delizzias e incantos
chi sas campagnas faghet abbellire.

In su percursu, chissà cantos
giovanos coros si an’ a unire,
cun novellos amores in sa vida.

Bolotana 1927

==========

Eccola sa bellissima istagione
piena de delizzias divinas,
sun verdeggiantes baddes e collinas,
su mundu est bellu senza paragone.

Est de nou fozidu ogni prantone,
sun perennes sas fontes cristallinas;
peri sos montes, campos e marinas,
cantat cun melodia ogni puzone.

Su rusignolu, cantende amorosu,
dat una sensazione profunda
rendindela festosa sa campagna,

e cun su trillu suo armoniosu
gasie istat dae frund’ in frunda
giamande cun amore sa cumpagna.

Bolotana 1928