Su monumentu de sos mortos in gherra
di Costantino Longu

Monumentu graniticu, t’an erettu
pro onorare sos eroes puros,
ch’ in sos cimentos sambenosos, duros,
a su nemigu paradu an su pettu,

affrontande sa morte cun dilettu
ca d’ aler pro sa patria fin seguros;
imparas a sos omines futuros
d’ aer a custos numenes affettu.

Tue ses chi a sos posteros tramandas
su numene de cuddos ch’ immolados
si sun pro un’ Italia pius potente;

chissà pro cantos seculos cumandas
a sa futura ‘Olotanesa zente
d’ esser custos eroes rimembrados.

====

Giovanos fin, ch’ in sa prus bella edade
sa vida pro sa patria an’ ispesu,
su prus aspru calvariu an’ ascesu
pro redimer dogn’ irredentu frade.

Cun ipiritu ‘e generosidade
an sa causa italica difesu
e mortos sunu senz’ aer intesu
su gridu de vittoria e libertade.

E oe pro memoria imperitura
restas tue, oh bellu monumentu,
sollevande a issos dae s’ obliu.

Mortos sunu e ignota sepoltura
in sos montes alpestres ana tentu
ma su numen’ insoro restat biu.