Ischindittas de lentore
de Antonio Sannia

Raras, d' 'onzi colore,
lieras, in s'aera,
che sa froca incominzan a calare;
derramana calore,
in donzi caminera,
e cun tottus si ponen a giogare.
Brincan cun sos pitzinnos,
a sonos de tintinnos,
che mamutones in carrasegare.
Dana paghe e lugore,
da' su chelu, ischindittas de lentore.

Cuntentas sun in bolu
bellas, cun allegria,
a las bier ti prenana su coro;
regalana consolu,
isparghen armonia,
tottus lusingan cun carignos d' oro.
Giogan in s'ighinadu,
chi de festa est mudadu,
meda s'appentan dandeli decoro
e donzi razza 'e frore,
cun sos colores bellos de s'amore.

In sa tanca 'e sa vida,
colande, pasizeras,
da' nou dipinghide sos sentidos;
'ogadeche sa sida,
chi serrat sas isperas,
d'ànimos chen'anelu, impoberidos.
Dadelis torra brama
filade donzi trama
dae nou tesside sos ordidos.
Puntos, istrazulados
dae sa filonzana ismentigados.

Cun su coro in sa manu,
si podides nos dade,
cun amore, momentos de recreu;
po chi torret s'eranu
in domo 'e donzi frade
tottus tenzan tribagliu, chen'anneu.

Seconda classificata alla XII edizione del Premio di Poesia in limba "Viniscola" - Siniscola 2013