Ite ti naro.........
de Antonio Sannia

Ite ti naro como, fizu meu,
paràulas non tènzo intro 'e su coro,
t'amos pesadu bellu, cun decoro,
cun amore, sa vida, t'amos dadu,
in chirca 'e ite ti che ses andadu,
lassande custa domo e su recreu.

In terra istranza, che teraccu anzenu,
ue non b'at ne domo ne pinnettu,
andadu ti che ses po cale apprettu,
chena mere chi pigat a cuile,
non tenes linna, non tenes foghile,
po su frittu adduradu t'est s'alènu.

Ite poto contare mama cara,
si custu fizu 'ostru, su duttore,
che sos mànnos non bettada laore,
cun sos bòes non l'ùsada s'aradu,
unu cantu 'e pabilu s'at leadu,
ma su tribagliu in bidda est cosa rara.

Innoghe puru, mama, non ch'at nudda,
a sida ana serradu sas isperas,
de nièddu sun tintas sas aeras,
non c'at perunu sensu 'e balentia,
tottus a contu insoro chena ghia,
bos naro chi sa sorte est sempre cudda.

Si cheres torra a domo caru fizu,
de siguru s' amore t'apo a dare,
custu, fizu meu, depes chircare,
attentu ch' in s'amore b'est s'essida,
da' sas difficultades de sa vida,
chi dae nou torran sempre a pizu..

Puite tando mi che so fuidu,
ca meda mi mancades mama amada,
d'amore dademi una zoronada,
bos assiguro bastat po campare,
dae manos bo che l'apo a leare,
est pane 'e trigu carrigu 'e sentidu.

It'est chi tando andamos a chircare,
pitzinnos in sa vida ch'est beninde,
difficultades nde semus bidinde,
bastat s'amore po las superare.

Prima classificata concorso di poesia in lingua sarda "Parrocchia San Gioovanni Battista" - Memorial Mauro Antonio Pittalis - Nuoro 2013
tema del concorso: "Problemas e bisiones de sos zovanos de oje"