Montes alturas iscalas pro chelu
umbe sa Luna si tocat a manu
inumbe vies prima su manzanu
e a su sole das s’ultima ojada
umbe reposat s’anim’afannada
e d’este in libertade donzi anelu

Montes altares de mente oriolu
chi ischidades nobiles sentidos
de onzi onesta pache sezis nidos
de divinos poderes possessores
domo de Deos e fortes pastores
de s’ispiritu aflitu su consolu

Montes chi mantenides inserrados
de donzi ammentu sa cuvada pena
de sa vida dimora frisca vena
sezis sa janna de s’animu umanu
umbe si viet su rincurrer vanu
des sos tempos venentes e passados

Montes intradas de campos amenos
chi in sa mente umana azis dimora
locos privados de tempus e ora
chi de s’eternu su sognu ischidades
a s’anima afannada totu dades
volanne supra e sos fatos terrenos

Montes chi a sos ventos li ponides
reparu forte chin fagher dezisu
parides de s’umanu corpus visu
chi dat sustentu a sa carena totu
torrades in serenu onzi abbolotu
a chie ascurtat nades su ch’ischides

Montes chi aperides a sos ojos
de terra e chelu sa bellessa insoro
prenos de dignidade e de decoro
dazes sinzales de faghere divinos
mustranne in umiltade sos caminos
foras de s’angustia e sos tripojos