S’anima contrita a pees de Jesu Christu crucifixu prorumpit in sos sighentes affectos de compunctione
di Matteo Madau

SEXTA

JESU, amante Redemtore,
In Rughe pro me suspesu,
Mi peneto, d’haer offesu
Tantu amabile Segniore.

Amante Crucificadu,
De s’anima dulce Sposu,
Mustrati Babbu amorosu,
Non sias piùs indignadu.
Tibi soli hapo peccadu:
Confesso che peccadore.
Mi peneto etc.

Rê supremu de sos Rês,
No pro sa pena incurrida,
Nè pro sa gloria perdida,
Sinò pro esser chie sès,
Contritu a sos tuos pês,
Piango, & clamo cun fervore.
Mi peneto etc.

Dami su dolore, & pena,
Dami lagrimas comente
A unu David penitente,
A unu Pedru, & Madalena:
Piena custa anima piena
De su tou sanctu timore.
Mi peneto etc.

Tantu sento haer offesu
A tale Segniore, & Deu,
Chî dia su coro meu
Partire mesu pro mesu:
Dami de s’offensa pesu
Chî morza a puru dolore.
Mi peneto etc.

Cando a tie dispretiesi
Pro custos benes finitos,
A tormentos infinitos
Cognosco mi condemnesi.
O comente non restesi
De s’infernu habitadore!
Mi peneto etc.

Cognosco ch’hapo peccadu,
Senza numeru, nè modu:
Cognosco chî a forte nodu
De culpas mi so ligadu:
Pro l’isolvere humiliadu
Dimando gratia, & favore.
Mi peneto etc.

No sento esser condemnadu
A fogu eternu infernale;
Piango sì pro chî est piùs male
Chi sia de te privadu.
Ahi de me, desdicciadu!
Si ti perdo, o ite errore!
Mi peneto etc.

Meríto esser castigadu
Cun pena eterna, & tormentu
Pro su meu attrivimentu
In tanta culpa, & peccadu:
Pro chi sia perdonadu
Como piango cum clamore.
Mi peneto etc.

O vida male impleada
In pensamentos mundanos,
In gustos, & tractos vanos
Continuamente gastada!
Pero como renovada
Cherzo chi mudes tenore.
Mi peneto etc.

Ja’ non cherzo piùs amare
Benes mundanos, & gustos,
Chi amarguras, & disgustos
Solen in coro lassare:
No mi den piùs ingannare
Gustos de malu sapore.
Mi peneto etc.

Mi spanto chî no has armadu
Contra mie sas creaturas,
Chi cun sas penas piùs duras
Podian haer vindicadu
Offensa tanta, & peccadu
Contra su sou Creadore.
Mi peneto etc.

Su fogu no mi hat bruxadu,
No s’est aperta sa terra,
No m’hat factu s’aera gherra,
S’aqua no m’hat affogadu,
Su chelu no m’hat jectadu
Rajos de fogu, & furore.
Mi peneto, etc.

De sas venas in riscattu
Desti su sanbene a rios
Pro tantos peccados mios,
Chi contra tie hapo fattu.
Et eo semper ingratu,
Et obstinadu offensore.
Mi peneto etc.

Perdonami cun clementia,
No mi tractes cun rigore,
Nè mi castighes, Segniore,
Pro tanta reincidentia:
Fagher depo penitentia
Chi det a su mundu horrore.
Mi peneto etc.

In su peccadu dormidos
Tantos annos si restesin;
Pero como si excitesin
Totu sos quinbe sentidos:
O annos male finidos,
Et pérdidos in su fiore!
Mi peneto etc.

Firmu proponzo observare
Sos sanctos cumandamentos:
Mai piùs in pensamentos,
Nè in paraulas peccare:
Totu cherzo relatare
Sinceru a su confessore.
Mi peneto etc.

Pro poder remediare
Tantu male d’una via,
Cantu est de sa parte mia,
S’occasione hap’a evitare
A tale de no agraviare
Tantu amante Redemptore.
Mi peneto etc.

Si ischére ch’in vida mia
Torre a disgustare a tie;
Segniore, mancu una die
De vida cherrer mi dia:
Mortu, & acabadu sia
Innantis de tale errore.
Mi peneto etc.

Pro chi si resten costantes
Custos propositos mios,
Sparghe in cust’anima rios
De gratia tua abundantes:
Ferila cum penetrantes
Frizzas de divino amore.
Mi peneto etc.

Rê supremu & Soberanu
De tremenda majestade,
Chi salvas pro piedade
Cando salvas su Christianu;
Pònemi a sa dextra manu
Sa die de su rigore.
Mi peneto etc.