Custa bella aurora
ch'in su chelu s'acherat
forsis annuntziat s'ora
de sa paghe ch'isperat

s'aflita umanidade
in lagrimas e dolu:
no esistit piedade,
no agatat consolu.

Gherras, distrutziones,
odiu e violentzia
e sas istitutziones
no connoschent clementzia.

Cuddos chi ant sos poderes
sunt ferotzes tirannos,
totu si cherent meres
e faghent solu dannos.

E sa terra pianghet
no at pius un'ispera
ca sa zente l'annanghet
luas de onzi manera.

Ma custu chelu giaru
det esser una proa
chi annuntziat s'amparu
de una vida noa?

E sa paghe chi cheret
tota s'umanidade
cantu prima si averet,
bincat sa libertade

Su Deus onnipotente
caminos de amore
preparat pro sa zente
in tempus benidore.

E pro s'eternidade
si sigat a gosare
paghe e prosperidade
in chelu terra e mare.