A bortas canno penso a su passadu
cumpudanne su coro e i sa mente
chircanne e seperare atentamente
tra cuvados afannos sos fastizos
in ammentu mi torran marterizos
chi su viver coladu m’an sinnadu

Vio de babbu sa sufertas penas
donzi bisonzu chi amus passadu
sas temporadas e su madricadu
a focu allutu in su fritu impoddile
notes d’iverru intro su cuvile
daenne pasu a istracas carenas

Venin de Belgio dolosos ammentos
de tristuras misciadas a dolore
su chelu frittu ‘e nieddu colore
sas lagrimas de mama e s’amargura
sa cara e babbu de carbone iscura
pro dare a nois serenos cuntentos

Caras ch’a vivas torravan de nou
cann’arrivavat iscrittu o littera
chi dae Orune vatiat sinzera
novas de jajas frades e parentes
de carchi isposu o novos naschentes
chi fin in coro che puntas de zou

De jaja su piantu appo de vronte
canno it saludenne in su partire
fipo minore e non podia ischire
de su dolore ‘e cussu momentu
su visu sou de ispera ispentu
chen’ider lughe in perunu orizonte

Poi de babbu cussa maladia
chi l’at privadu de ancas e briu
su ranchidu surrisu ancora viu
a fizos mios in su carignare
ancora oe m’achet lacrimare
canno bi penso solamente ebbia

Vio de mama sa mente isvanida
volanne sola in maternu ammentu
priva e gajos e senza cuntentu
mutinne chin sos ojos de amore
ranchidos tempos tempos de dolore
chi accumpanza sa poghera vida

Sa mea puru quasi est finida
ammentos eo puru apo a lassare
torra e afetu ana a lagrimare
sos ojos chi abberu m’ana istima
sas suferenzia sas penas de prima
ateras mentes mantenene ischida

Santu Gavine 2015