(da Stecchetti, Postuma VI)

In sos benujos Chillina
beni e alligra ti sede
e a mie, bella, cunzede
cuss'ermosura divina.

Beni e i su tuju diletru,
Chillina bella, m'abbrazza
ca tando deo sa fazza
t'app'a cuare in su pettu
e de mi tenner affettu
tue tando determina.

Beni e i s'oju brillante
fissa in custos ojos mios
e chin sos basos dechios
consòlami bella amante,
e chin firmesa costante
custos amores cuntina.

Istrintos ambos impare,
basèndenos in sas laras,
cuntentesas pius caras
mai podimus lograre
e nos det imbidiare
totu sa zente meschina.

Cun cuntentu e allegria
oras e oras passamus.
impare nos ispassamus
chin tegus, Chillina mia!
Pro t'àere in cumpagnia
mando su mundu in ruina!

Beni e alligra ti sede
in sos benujos Chillina!