A sa Mandra Pilosa so torradu
ue s’annu passadu fissu fia
e de nou a tie apo pensadu
de sa vida passada in pizzinnia
in su matessi zassu ap’ammentadu
attacos cun sa nostra poesia.
Mai fimis istracos de cantare
pro ch’oe non mi cherfas faeddare.

As sessantachimb’annos Pietrinu
ma sos amigos non los irbandones
ammentadi cand’eo su puntinu
impreaia pro fagher cantones
tue, nud’e iscurzu in su caminu
disizaias mudanda e pantalones
tott’istrazzadu da conc’a brenugos
fis donzi die a buttones nudos.

Ma como t’est su tempus cambiadu,
t’est isparida onzi nezessidade
creschinde as in tottu mezzoradu,
solu chi fues sa soziedade.
T’as leadu aneddu e ses fizzadu
e dias esser omine atempadu,
o caru Pietrinu pro Carbone
non vivas arrestadu che sirbone,

mustradi prus amigu cordiale,
sinzeru e fidele a sos amigos,
mighi nessunu a tie cheret male.
Ses fora dae brigas e intrigos,
però risponde a mie puntuale,
Pietrinu azzetta sos obrigos
ca ti obrigo deo a mi rispondere
cun versos metricados de cumponnere.

Ses vivinde continu retiradu,
chi pares cundennadu presoneri
dae sa orta chi t’apo agatadu
cottu a una feghe in su zilleri,
sa este noa t’aias imbruttadu,
fis che pedulianu bituleri
dae sa irgonza as fattu sa die,
pius in ziru no hant bidu a tie.

Ma deo ca ‘nde vivo in custu monte
non ‘nde cherzo né brigas né peleas
solu c’a tie cheria de fronte
e a fiancu a nois duas deas
cando est su sole in s’orizonte
boghet indeoradas sas cadreas
a nois ambos de che sezer susu
pro cantar’e iscrier de piusu.

Pietrinu rispondeli a Carbone
si non de Concas diventas Concone.

30-08-2009