A CORFOS DE MATZUCU
Di Lorenzo Brandinu

Massajos e pastores
si ponen a cumone
a Roma pro andare a protestare
bandas e mucadores
si pican su barcone
totu paris nde giampana su mare
sos mannos e minores
sa sarda chistione
cumbintos de la fagher ascurtare
ca fit s’isola amada a disisperu
pejus de cando fit suta s’imperu

isbarcan in su portu
los pican pro bitellos
los isserran in intro ‘e su cunzau
manc’unu ndan isortu
lis cunzan sos cancellos
comente fizos de malebadau
e senz’aere tortu
tzafos e manganellos
ca de badas non avian protestau
apenas postos sos pedes asciutos
los lassana matzaos e iscutos

poi in sa capitale
cumbintos de su zustu
però s’impresa fit disisperada
non fin fatende male
si tremen de s’assustu,
ca nde lis dan un’atera passada
chin fagher uguale
los pistat che i su mustu
nande ch’it totu zente malandada
menzus non b’at, pro gana e carestìa
che manganellos de sa polizia

in annos de disgrascia
e tempos de miseria
los pistan e los lassan de istucu
lis ponen una fascia
chin meda cativeria
e los messan che cannas de savucu
thucan a conca bascia
e a sa dimanda seria
lis risponden a corfos de matzucu
si pedin pane, oe pejus de eris
già liu cuchinan sos carabineris

inedita