(In memoria de Antiogu Casula) “Montanaru“

M’acatu, cantu fàtzili
no siat, su tentai de iscriri
de unu « maistu » de versus
infrissius de « bellesa », de natura
di amori…de vida e de Sardigna.
Poeta de is prus mannus
a parri miu in su cantai,
disfortunau … e diciosu
de fueddu, in su rimai.
Profundu e cristallinu
che àcua ‘i arriu,
spantosu… in su nai
de sentimentu, chi siat de gosu
opuru de turmentu.
A craiori de luna … in soledadi
fùndiu intr’a cristas, a pinnicas
di arrocas, de montis di amatista,
intr’a castangius, ilixis antigus
i arremonius de cudd’ora …trista.
Poeta sciustu di àcuas
de mitzas friscas chi cantant
i abangiau di amori, cussu biviu,
perdiu…de cussu no gosau
“a bos’amentades comare?”
de cuddu … mai olvidau.
Oh, poeta de dudas
e de preguntas, a is calis no si podit
torrai … sa disigiada sceda,
divinu in su cantai
celus biaitus … de seda,
lebius, asuba’e bicus artus
a trivas, paris in bellesa
sprigaus a maris asulus,
che prata… in luxentesa.
De su poeta, a bivi cun su cantu
sighint de is pastoris is boxis
cun s’isplendori de sa natura
po mantu, “a nos bider a beranu
a godire impare cust’incantu.”