A DIOSA

Non potho reposare, amore e coro,
pensende a tie so' donzi momentu.
No istes in tristura, prenda 'e oro,
nè in dispiachere o pessamentu.
T'assicuro ch'a tie solu bramo,
ca t'amo forte, t'amo, t'amo, t'amo.

Amore meu, prenda de istimare,
s'affettu meu a tie solu est dau;
s'aere juttu sas alas a bolare
milli bortas a s'ora ippo bolau,
pro benner nessi pro ti saludare,
s'attera cosa no a t'abbisare.

Si m'essere possibile d'anghelu
d'ispiritu invisibile piccabo
sas formas, e furabo dae chelu
su sole e sos isteddos e formabo
unu mundu bellissimu pro tene,
pro poder dispensare cada bene.

Badore Sini