A Gemma
di Larentu Pusceddu

Gemma de numen,
Gemma de valore,
naschida in s’istajone de s’eranu,
cando su chelu s’aunit a su mare;
naschida in Maju, su mese de sos frores,
ch’isparghet nuscos in s’aèra
e pintat de colores sa durche Baronia.

Cando as apertu sos ocros a sa luche,
Inghiriada de amore,
as bidu su locore de mama tua
e de babbu tuo sos ocros in isettu.

Mirandedi
T’apo notadu in cara sos rujores,
bandera de sa salude,
E apo osserbadu cun ammiru
sas maneddas tuas longas e fines,
de zentilesa sinnos.

Gemma de su coro nostru,
Gemma de oro luchente
cresche, cresche ermosa e sana,
forte e sapia che sos mannos tuos,
ca in sos seros de istiu in sa friscura
e in sos seros de jerru cara a focu
t’apo a cantare milli a duru duru.

Mannoi Pusceddu

Siniscola - vintiduos de Maju de su 2005