1

O de Sardigna ispiju lughizente,
pro chi sias veladu non ti addoles,
ca si faltados ti sun duos soles,
in coro giughes unu fogu ardente,
e podene sos rajos de sa mente
pius de sas pupias dare lughe!
Non ti lamentes de portare rughe
Pesante, ch'est sa rugh'e Costantinu !

2

Est cudda chi mustresit su caminu
Gloriosu a s'Esercitu Romanu,
sa chi forte Goffredo hat giuttu in manu
pro liberare su Sacru Terrinu!
Cussa rughe chi tenes in su sinu,
e ch'in sa gherra has balanzadu tue,
lumenosa est comentei sa nue,
chi guidesit su Populu Ebreu.

3

Cussa ti hat dacu su matessi Deu
pro lobare una gloria mazzore!
Cando cheres ti dat unu lugore
Ch'illumenat su mundu tottu intreu;
cando cretas de giugher unu neu,
pius vivos ti brillan cara e fronte
Sa rughe tua tottu s'orizzonte
Italianu bestit de fiama !

4

Beneitta chi siat cudda mama
Sa ch'in Laerru hat generadu a tie !
Deus istabilidu hat in su die
De ti distingher su mezus in s'ama.
In s'ora chi lompeis a sa brama
d'esser feridu e de torrare iu,
sa tristura a'su mundu hat dadu adiu,
si oltat su piantu in allegria!

5

Non tind'importet s'in sa pizziania
dulches ti mirene ojos de ajana
Sa bellesa in sa Terra est cosa vana
E bolat che fiores de sisia.
Ma solu ch'a sa patria nadia
Sacrificadu has sa lughe solare,
che a santu ti devene adorare
in sa vida presente e posca in morte!

6

Cunserva dunca in pettus coro forte,
e pensa chi sa gloria non morit,
anzis de mezus rajos ti colorit
cando paret cuntraria sa sorte.
Sos Anghelos ti deven fagher corte,
ch'às cumpagnia bianca nida,
comente hat bidu Dante in Paradisu!

7

In su t'ider ti fettan bellu visu
Tottu sos mortos in sa frontiera,
e s'azzendt de lampanas s'aera,
chi circundene a tie a s'improvvisu !
Sos martires ti mustren giogu e risu
cun sas prommissas de s'Arcu Balenu
de chi lobret s'Italia in pienu
sa bramada Corono imperiale !

8

Vive tranchigliu, ca ses immortale,
comentei sa gloria chi tenes,
e de su mundu superat sos benes
cuddu ch'a tie paret unu male!
Sas mamas, pro ispiju e pro signale,
ti den mustrare a sos fizos insoro,
Diamante ingastadu tottu a oro
Chi das lughe a Levante e a Ponente!

Giuseppe Calvia Mores - gennaio 1916