1.
Si mi permittis Luca ti iscrio
De sa camera tua duas rigas
Si tue ti offendes e mi brigas
Ischire e domandare nde cherio
Si faes custu non prango nen rio
E antzis mi risparmias fadigas
De sa furia tua mi riparo
E su chi cherzo narrer non ti naro.

2.
Bio sa porta de camera aperta
E intro sentza esser dubitosu
Che unu libertinu curiosu
S’abbaidàda subitu ch’est ferta
E sa sorpresa est istada certa
De sa foto elegante e pomposu
A berrita e in sardu costumene
T’apo connotu sentza lezzer numene.

3.
Sa prus chi mi at postu imbaratzos
E ti juro ca comossu mi ada
A Valentina jughes abbratzada
Istrinta in sos tuos bellos bratzos
Distinta e nota in sos pupatzos
De pagas dies prima battizzada
Est foto chi sa vida orizzòntada
Cantu durat mundu non tramòntada.

4.
Sunu fotos de varios modellos
Ddas bio attaccadas a su muru
E creo ca cuntentu ses siguru
Fotografau in mesu ’e gioiellos
In mare in montes e in castellos
In frumenes e in bellas digas puru
In sa campagna ’e varia distesa
Fotografau cun sa cinepresa.

5.
Seis cun Valentina in su mare
In s’Archittu girande s’ispiaggia
In Gavoi Taloro e Barbagia
Mont’Ispada e Gennargentu impare
Desulo Fonni e su Monte Gonare
In sa festa turistica randagia
Cunservaddas po prova notoria
Custas fotos de alta memoria.