|
A Luisi Ladu
di Salvatore Enne
Nessi trintachimb’annos c’hat
passadu
da cant’a tie connottu t’aia
mustazzi mannu e chenz’isbarbadu.
Ma fis ladinu, de anima ia,
distintu cun su tuo faeddare,
barriadu de amore e simpatia.
As imparadu a forza ‘e viazzare
ca doigh’annos aias appena
cando a Nuoro as devidu lassare.
Partidu che fis solu in terra anzena
cun d’una valizedda de cartone,
chi de pagos istrado l’ais prena.
Cando lassadu as s’istazione
pro passare su mare a s’atter’ala
Mamma ti dat sa benedizione.
Ma de sa nave pigande in s’iscala
ti abbundant sas forzas e bideas
chi s’est fuida d’onzi ura mala.
Cun su corazu affrontas sas peleas,
magari essende ancora criatura,
ti sonnias in brazzos riccas deas.
E incontrande pessonas maduras
ti leana a iscola inue artistas
ti faghent fagher sas bellas figuras.
E attrices connosches, musicistas,
chi sas provas ti faghent in treattu
e dae tottu fiduzia conquistas.
Ma cando pius mannittu ti ses fattu
sende torrande dae cuss’iscola
ti es paradu de fronte unu ritrattu.
Fit una zovanedda sola sola
partida a s’avventura che a tie
dae custa triste terra sardignola.
La frimmas e li naras rie rie:
“ma si tue ses sola it’est chi faghes
beni cun megus, pone mente a mie.
Si ti piago comente mi piaghes
abbandonamos custu continente:
torramos a sa terra e sos nuraghes.
M’ana nadu chi sunt chircande zente
in s’industria noa ‘e Ottana
e deo b’appo inie unu parente.
Mi che faghent b’intrare a mala gana
e su tribagliu inie tenimos,
nos faghimos sa domo in Bolotàna.
Prima in matrimoniu nos unimos,
poi a sa Sardigna rientramos
e sos nostros parentes connoschimos.
Como chi in Bolotana abitamos
Unu bellu salariu a su mese
Bies Maria chi lu ritiramos.”
Oh Luisi torradu tinde sese
mighi in su zentru trasfusionale
cantu prima che deves ponner pese,
ca b’at pius pessones chi istant
male
e nezessitant una sezione
pro podes tennere liquidu venale
e tue pares s’unica pessone
pro essere unu bonu presidente
cherzo c’azzettes pro s’occasione.
Oh Luisi ca ses intellizente
as devidu s’incarichu azzettare
cun educazione riverente.
Como tottu ti solent rispettare
ca ti connoschent che benefattore,
ti ses l’ischidu bene cumportare.
Luisi ti saludu caramente
deo pro parte e su paese intreu
a sos chent’annos chi lu cherfat Deu
Torrare cun Maria in continente.
Bolotana, 2/8/2009
|
