A Luisi Ladu
de Franco Piga

(Noe Retrogadu)

Luisi cant’onore chi ti faghet
su Situ chi piaghet chentza crisi,
pro chi sardos atùet e disvaghet
cant’onore chi ti faghet Luisi,
su situ chi chentza crisi piaghet
pro chi sardos disvaghet e atùet,
e chie, da-e custos versos suet,
dende a totu valore cun importu.

E pro tantos est puru de cunfortu
e recreu seguru a totucantos,
e puru de cunfortu est pro tantos
e a totucantos recreu seguru,
e de cunfortu pro tantos est puru
custu logu ’e abboju e bonumore.

Luisi cant’onore chi ti faghet
a totu dende importu cun valore.

Cuntentu, chi lu fetas s’’enidore
mandende de poetas cust’ammentu,
chi s’’enidore lu fetas cuntentu
cust’ammentu mandende de poetas,
chi s’’enidore cuntentu lu fetas
gai chi nudda imbaret in s’ignotu.

Luisi cant’onore chi ti faghet
importu cun valore dende a totu.

Benes de giudu contes a fiotu
e su tempus afrontes in saludu,
contes a fiotu benes de giudu
e in saludu su tempus afrontes,
a fiotu de giudu benes contes
pro chie cheres bene e ses preghende.

Luisi cant’onore chi ti faghet
importu cun valore a totu dende.

Unu carignu raru so mandende
ca ses caru de tant’istima dignu,
raru ti so mandende unu carignu
de tant’istima dignu ca ses caru,
Unu carignu so mandende raru
cun isperas de lughe e de cunfortu.

Luisi cant’onore chi ti faghet
dende a totu valore cun importu.