Ti dia dare istrinas de lentore
e cantones de ua a romagliette
cun mutas de sentidu a fogu tentu
porrèndedi in saffata che fiore
colores sonos nuscu e sainette
de sos padros chi ninnas in s’ammentu…

Su manzanu cun ala isolt’a bentu
brandu ti pesa che ae in beranu:
attraessende mundos de bellesa
in sos foghiles nadios ti fala;
isolt’a bentu a manzanu cun ala
brandu ti pesa che ae in beranu;
cun ala isolt’a bentu su manzanu
brandu che ae in beranu ti pesa:
attraessende mundos de bellesa
in sos foghiles ti fala nadios.
Istranzos, su matessi mannos mios
sun andados tottue essi per essi;
mannos mios, istranzos su matessi
essi per essi andados sun tottue…
In su càntigu meu issos e tue
sezis frades carrales tando e como…

primu fiore

Sa zente t’hat furadu ‘isos e domo
e chi sa sorte est bìdriga t’han nadu:
fis che anzenu chena ‘oghe in corte
sende padronu in desertu e padente;
domo e bisos furadu t’hat sa zente
e chi sa sorte est bìdriga t’han nadu:
sa zente ‘isos e domo t’hat furadu
e nadu han chi t’est bìdriga sa sorte:
fis che anzenu chena ‘oghe in corte
sende padronu in padente e desertu…
Disizu presoneri in chelu abbertu
e fera pessighida feri-feri;
disizu in chelu abbertu presoneri
e feri-feri fera pessighida:
inzerrende sa vida pro sa vida
tra bunturzos cuados che… anades.

segunda retroga

Ti dia dare istrinas de lentore
………………………….……
In su càntigu meu issos e tue
como e tando carrales sezis frades.

segundu fiore

Connottu mannas has tzivilidades
e che matenna t’han sinnadu tottu
proende in pensu e carres pro cundenna
funes padronas e sididas sannas;
has connottu tzivilidades mannas
e che matenna t’han sinnadu tottu;
tzivilidades mannas has connottu
e tottu t’han sinnadu che matenna
proende in pensu e carres pro cundenna
sannas sididas e funes padronas…
Ma si altu su cantu tou intonas
consolas s’ànima e feris che craltu;
ma si su cantu tou intonas altu
consolas s’ànima e che craltu feris.
E cantende sas làccanas abberis
nend’a su mundu: punno, cherzo e ando

ultima retroga

Ti dia dare istrinas de lentore
………………………………..
In su càntigu meu issos e tue
sezis frades carrales como e tando.

ultimu fiore

Deo chi non possedo ne cumando
chie nd’ischit s’indonu naro e pedo?
Ma so poete! A tzàcchidas de tronu
su versu che atzotta atzesa impreo;
chi non cumando ne possedo deo
chie nd’ischit s’indonu naro e pedo?
deo chi non cumando ne possedo
chie nd’ischit si naro e pedo indonu?
Ma so poete! A tzàcchidas de tronu
su versu impreo che atzotta atzesa…
Tue non cheres solu pane in mesa
cheres aeras de astore in bolu;
tue non cheres pane in mesa solu
in bolu cheres de astore aeras
inue potas currizare isperas
torrend’a pascher sónnios traittos…
Gai logrende suore e dirittos
ti brotet rosas friscas su dolore;
gai dirittos logrende e suore
su dolore ti brotet rosas friscas
e-i sa manu ‘e s’ómine chi chiscas
t’ispampàrriet giannas de amore…
Ti dia dare istrinas de lentore.

1° Premio Città di Ozieri 2009, Sezione: Tra poesia e canto. Moda