Moda

Isterrida

De Davide, istirpe fiorente
Fit Nathan sacerdote betlemmita
Sant’Anna, fiza vera beneitta
Credente, giusta po sa preghiera
Sant’Anna fiza beneitta vera
Isposada cun Santu Gioachinu
Po voluntade ’e su Deus Divinu
Et est Maria Vergine po fiza
Innocente, cunsagrada e pura
Mama ’e Gesusu: sa santa figura
E Sant’Anna matrice educadora
A sa Signora le rendet osanna
Educadora nutrice Sant’Anna
Cun Gioachinu, po cussu tesoro
E cun s’intimidade bell’insoro
A su Deus divinu est cunsagrada
Che Santa, Mamma, luminosa istella.

Primu fiore

Sias cumpagna, vera sentinella
In mare, in campagna, in s’aera
Sias cumpagna sentinella vera
In s’aera, in mare, in campagna
Sentinella sias vera cumpagna
Po nos mustrare sa deretta via
Faghelu Tue, Vergine Maria
Sias de tottus Santa piedosa.

Prima retroga

A su Deus divinu cunsagrada
………………………………..
Che Mamma santa istella luminosa.

Segundu fiore

Ses de giardinu sa prus cara rosa
De su terrinu su male ripara
Ses de giardinu sa prus rosa cara
E ripara su male e su terrinu
Ses sa prus rosa cara ’e su giardinu
Cun varios colores profumada
E de puresas santas coronada
In virtude s’olia cun sa palma.

Segunda retroga

De Davide, istirpe fiorente
……………………………
Istella luminosa santa ’e Mama.

Ultimu fiore

Perun’atera de onore e fama
Ca lu ses luna ses astru mazore
Perun’atera de fam’e onore
Ca ses astru mozore ses che luna
D’amor’e fama, atera peruna
Sa preghiera, est contemplatzione
Ca ses unica sa perfetzione
Sa mezus frutta ses de sa pianta.

Ultima retroga

De Davide istirpe fiorente
……………………………
Istella luminosa Mamma e santa.

Dispedida

Intona s’evangelu lodes canta
Dae su chelu Divina ca podes
Intona s’evangelu canta lodes
Ca lu podes Divina dae chelu
Intona lodes canta s’evangelu
E dognunu cumpati e perdona
Lodes canta s’evangelu intona
Sias clemente po su peccadore
Mastra Regina de s’apostuladu
Nos cuntzedas in tempus benidore
De Ti dare su chi non T’amos dadu
Faghesi nos connoscher su valore
Ognunu cantu prestu illuminadu
Essende Mama de su Salvadore
Mortu pro Nois e risuscitadu
Faghe chi Nos non manche su sorrisu
Imbia solu beneditzione
Da cussu Regnu de s’Onnipotentzia
E cunfidende in su Paradisu
Ti saludo cun s’oratzione
Ponzas paghe sulud’e assistentzia
E bonanotte e bona peranentzia.