A Massimu
di Franceschino Satta

Sos ocros bellos in colore ’e mare
sa bucchichedda prena ’e simpatia
sos pilos de su babbu sa zenia
paren ispicas prontas a messare.
Sa mama l’incuminzat a cantare
chin sos muttos d’antica melodia.
Sos angheleddos de Santa Maria
pinnicos benin a lu laccheddare.
Su babbu si l’annotat incantau
e si lu passat mannu e birtudosu
chin nd’unu aneddu ’e oro, adduttorau.
Sa jahja che lu biet za isposu
chin sa prus bella e ricca ’e bichinau
in dondoletta, tottu corconosu.