A MORANTE E MUZERE IN SOS ISTADOS UNIDOS
di Francesco Sanna

Tunisia, cabidanni de su 2012

Telefonande da sa rete fissa
(ca costai troppu a su tzellulare)
cuddu dimoniu sighinde a sonare
tenia s’origa chi pariat frissa.
Pensand’a malu apo dadu una missa
pidinde a Deus de bos peldonare;
ca sutta su colzu ‘e materialistas
b’at coros bonos de animas tristas.

Za ti cumprendo, istimadu Daniele,
primmu in iscola e poi in dogni cogiu(1)
fattu ti ch’ana sa conca che mogiu
e t’ana resu cun Deus infidele..
Ite ti balet su zene ‘e Israele
si de su coro no tenet s’apogiu?
A dogni modu si ancora ses biu
za b’at isperu pro un’ater’istiu.

Tzirriande semper e pensande gai
ecco a sa fine una ‘oghe carigna
m’at informadu ch’in Terra Maligna
sezis in giru, e m’at nadu “bai bai”.
L’apo rispostu: “deo so’ de Sardigna
e Istados Unidos no’ semus mai”.
A dogni modu m’at dadu cunfortu
nessi s’ischire chi za no’ ses mortu.

Galu unu dubiu mi restat ebia:
coment’as fatu a passare su mare?
Erica Jong t’at azuadu a bolare(2)
o t’as tentadu de Alaska sa via?
No creo cun Costa(3) as decisu ‘e rischiare..
Cando as’ a benner in Tunisia
m’as a contare de cust’aventura
e de su ‘Chelu’.. si ancora as paura.

* * * * * * * * *
_______________________________
1) Morante s’est cogiadu tres boltas
2) Erica Jong: “Paura di volare”; s’amigu Morante timet de ‘olare
3) Fui s’annu chi ch’est afundada sa “Cuncordia” de Costa Crociere