1
Sa primavera est torrada frorida
e jeo venzo ancora a ti chircare
denneti novas mias de sa vida.
2
Vida chi at dezisu e mi lassare.
garrigadu continu de dolore
senza cuntentu podere azappare.
3
Sognos pius no aco de amore
so mesu mortu, so che ramu sicu
no apo prus su giovanile ardore.
4
De sognos pius non bi so ricu,
no at reposu sa mia carena
pius non dormo ne meda o azicu.
5
Su sambene est nieddu intro sa vena
aspetto s’ora e s’ultimu viagiu
pro chi depat finire custa pena.
6
Chirco solu de m’infundere coragiu
aspetenne chi prestu arrivet s’ora
in vida de sa morte apo s’assagiu.
7
Senna sa rima paret fughidora.
per’issa fuet da sa sepoltura.
ma si tue passenzia ass’ancora
8
e custa cantilena non t’est dura
asculta e si podes la cunforta
de unu ch’est morinne s’isventura..
9
A sa morte sa mente est gia resorta
e de issa s’arrivu at’ azettadu
pro chi siat dirita e mai torta
10
s’istrada chi mi viet sepultadu.
Malu est a morrer morinne giovanu
senza su munnu aer visitadu,
11
su tempus chi passadu l’apo invanu
pagu l’at dadu a sa mia pessone
est che die chi morit a manzanu.
12
Est soffocadu cantu de cantone,
chi no essit da ojos est piantu
o rimas abbandonadas in contone.
13
In mente non ne apo prus ispantu
miro sa morte e faeddo cun issa,
lutuosa e in funebre mantu.
14
Calchi vorta appo un’idea fissa
de su toccu dolente e sa campana
sonennemi sa morte annenne a missa.
15
Certu sas novas meas non ti dana
de allegria notizias bonas
Su coro afligin senza naer gana
16
Ma tue caru amicu chi mi donas
s’ ascultu tou in cust’ora fatale
custa leredda mia isco perdonas.
17
Sempere in vida ap’apidu male
su recreu no m’est mai tocadu
solu dolore senz’unu’uguale.
18
Mai giovana affettu a mie at dadu
forzis so jeo chi non ne so dignu
ca custu coro apo tentu serradu
19
Morzo senza proare su carignu
fatu da manu chin grabbu amorosu
sugellu in laras e de amore signu.
20
Tantos amigos in custu istadu annosu
ana su numes meu immentrigadu
forzis ca custu male est ifadosu.
21
Ma tue ischis no mi so fidadu,
mai appo contadu in zente gai,
mai amistade sincera mi an dadu.
22
Appo a patire ma ti giuro mai
banno a pedire azzudu jeo a issos,
preferjo istare in pena e arguai.
23
Sos sentimentos mios suni fissos,
non girana che bentu in su cuzone,
rispetto semper sos pattos promissos.

24
Mi dat dolore e sa mia pessone
ista ferida solu a los intennere
cuddos chi senza arte e ne rejone
25
promissas a su ventu solen vennere,
senza pudore e senza rispettu
ti cheren senza fune solu prennere.
26
Dae cussos non b’at perunu isettu
viven de trampas e de malas tramas
videnne solu s’insoro profettu.
27
Pogherittas sa fizzas de sas mamas
chi cun issos che solen capitare
pensanne chi las trattene che damas.
28
No ana meda istima in su trattare
e in affidu sun meda leggeris
ponenne iffattu a tottu pro campare.
28
Non timen lezze ne carabineris
calpestan sos dirittos de ognunu
cancellan sas promissas fattas eris.
29
Mai no intrat in galera nisciunu
de custos bruttos vermes ischifosos
ca chin zustiscia nan chi son tottunu
30
In locu caldu an postos umbrosos
cun su frittu son bene cuccuzzados
a nois trattattan che canes runzosos
31
Suni corrottos semper iffadosos
an solu in conca su deche po chentu
o bi lis das o ti seccan sos ossos.
32
Canno appena cambiat su ventu
derettu vana a domo e chie at vintu
anne vantare su forte talentu.
33
A sos chi furana sa conca ana cintu
chin coronas de laru imperiale’
pro cuccuzzare su criminale istintu.
34
Nemos li ponet in coda su sale
nemos lo ponet in reclusione
tottue lassan in dolu e faghen male.
35
Chie protestat finit in prejone
chin d’un’iscusa sa piu adatta
pro chi sutterret donzi chistione.
35
Pro umìles mai zorronada b’atta
sa gana sun pattinne e su bisonzu
semper dolores lis ponen in matta
36
Lo assistini in tempus de votonzu
ma tottu finit ca non b’at prus lana
ca senza issa non faghes filonzu.
37
E sos chi su trabagliu prus no ana
istan chirchenne e pedinne in tottue
pejus de pedidore in tempu e gana
38
Ca non nos bastat, ma ja l’ischis tue.
de emigrados est tottu pienu
ch’ist’an pedinne annanne rue rue
39
Pro sas feminas est tempus amenu
in donzi cosa son vhocanne dirittos
chin quotas rosas prenas de velenu.
40
Senna cuddos de gustos pacu drittos
tra omines si cherene isposare
e cheren puru fizzos pogherittos.
41
App’intesu carcunu dissizzare
che cane o gattu essere trattadu
ca d’issos vien ch’est bonu s’istare
42
De mandrones su locu est pienadu
chi non sentini perunu dovere
solu dirittos lis an semper dadu
43
De carchi pride custu est piaghere
ca sa cussenzia podet rescattare
ca in perdonu nanchi isse est mere.
44
Est finidu s’onestu tribagliare
de s’Italia chi fit che giardinu
Como imperat su verbu furare.
45
Senna su fizzu allattadu in su sinu
po sa droga sa mama rapinata
Basciu e sentimentos est mischinu.
46
S’issa sa pensione no li data
este un’ifferru su trattare sou
chi nemos pessata e mancu immagìnata
47
Sos terrinos chi fini a montou
venini abbandonados e derruttos
e sun pacados chie ne dat prou
48
Operas chi mai dana fruttos
faghene chin dinare e tottu cantos
prenanne paren chin issos sos puttos
49
Sas marinas de cimentu a mantos
an cucuzzadu senza riguardu
Pro venner domos e pro fagher dannos.
50
In biddas nostras ne prestu ne tardu
essin a carchi arjola o a cuvile
aspettan tottu ma non colat lardu.
51
Vivimus tottus in istadu febbrile
de cosas vanas chi non dana ispera
semus vezzos d’aspettu giovanile.
52
Certu chi custos signos in s’aera
de su bennere non da bona promissa
senna in chie no lu cunsidera .
53
Forzis sa mia est un’idea fissa
e pedo iscusa si ti so iffadenne
ti promitto chi non faeddo e issa
54
Perdona a chie est sa morte aspettenne
narami comente ista tue
e sa cosas si ti sun bene annenne
55
Accottia a mi rispondere si in cue
sas cosas sun diversa da inoghe
ca ja l’ischis so che passizzera nue-
56
Ca bastata un’isturridu de voghe
si dissolvet in chelu prontamente
sa risposta c’aspetto erettu moghe
57
Ca l’ischis podo morrer de repente
non poto narrere ne si e ne no
tanta cosas mi colan in sa mente
58
Si tue cunsideras su chi so
Derettu as a rispondere so sicuru
Faghemi nessi custu piaghere ajo
59
Isco chi tue coro non ses duru
E custu piaghere mi lu deppe
Faghemi luche in custu munnu iscuru

Ti saluda de coro ziu Peppe