Camilla de babbu e mama ses s’orgogliu
ses su bene chi deus lis at dadu
ses s’azzudu a s’affannu senz’imbrogliu.

Ses su fruttu can pedidu e bramadu
de un amore importante e sinceru
chi at sas domo nostras rallegradu.

Tue de babbu e mama ses abberu
sa fiza de su coro e de sa titta.
canno t’abbrazzan no lis paret veru.

D’istringhere cussa fizza beneditta
premiu singulare de s’amore
chi prenat d’allegria umbe abitta.

A zaju e zaja attis bonumore
e lis addulca su tempus continu
de sa ezzesa ch’intrat chin tremore.

Isparghes che briosu cherubinu
crarores luminosos e che meighina
sanas su coro insoro intr’ e sinu.

Ses frizzante e leppia che frina
e infriscas d’onzi animu e sa zente
isperdenne che lughe mattutina

sos mantos tenebrosos de sa mente.
Canno chin sos istracos ojos mios,
lacrimas de anima innozente,

vido in sos tuos, umidos guttios,
chirchenne de mama tua su consulu
sas oras nostras pienas de brios.

Galu no ischis tue ites su dolu
ancora no ischis tue it’est affannu
galu se a leare cuddu volu

chi vatta incontru a sa pena e s’ingannu
incominzenne tue ses appena
ca arribbada no ses a un’annu.

Intro e te es bunnante sa vena
de sa vida chi as innanti a peese
chi ispero longa e de salude piena.

Ca tue de tottu cantos nois sese
sa perla risplendente e fiorida
chi nos rallegrat donzi die e mese.

Tottus sa istajones de sa vida
sian pro te brillantes che istella
e sa lughe ti servat de guida.

Faghenneti continu sentinella
cun s’intellettu tuo semper potas
esser su faru e sa parentela.

Cun visiones sapias e dotas
torres cunfortu a sas umanas,
distruidoras cherellas e lottas.

Canten pro te sas friscas funtanas
armonias festosas immortales
melodias serenas e arcanas.

In sa vida de sos connottos males
sos dolores che balsamu tue lenas
appas bunnantes donos naturales
e sa fortuna t’iscurrat in venas.

Nuoro, 22 settembre 2012