Naschidu ses in terra americana
dae babbu kenianu e mama brunda.
De creschere semper aias sa gana
In sas Hawaii, a ue b’at bona unda

Meda innanti pro s’inteligentzia
sempre primalzu ses in sas iscolas,
e cumprendende totu cun sapientzia
a s’universidade ti nde colas.

Fatzile ‘inari cun s’avocadura
pro sa giustiscia ‘ona as lassadu,
de poberos t’as leadu premura
diventende politicu pretziadu.

E no allu chi giompes a primarias
in mesu a tota cussa zente bianca,
e chena ti leare medas arias
as simpatia a dresta e a manca.

T’amus bidu signore elegante
cun dechidas e cumpridas peraulas,
e a s’ofesa de calchi birbante
cun veridade as binchidu faulas.

Nachi Mac Caine fit insuperabile
e Hillary cherian seberare
ca tue paristi criticabile
de isfidare s’eroe militare.

E mi chi Hillary lassat pianghende,
a malagana, ca ‘idet su forte
candidadu chi s’istrada est fatende
a sos Kennedy sinnados de morte.

A sa luta finale como arrivis
ma pro MacCaine non bi sun sas cartas,
e-i su mamentu de gloria tue bivis
cun muntones de ischedas ispartas.

Oe chi ses presidente americanu
medas sun sos problemas de afrontare,
ma como totos ti dan una manu
po resessire a bene guvernare.

Deo già m’aiseto chi s’economia
mundiale luego siat mezorada:
no cun ricos morzende ‘e bulimia,
no chi su famine ‘incat in s’istrada,
ma chi sas gherras sien totas finidas
cun d’una paghe chi torret sas vidas.